സൂര്യൻ ഒരു wow വ്വാൽ

സൂര്യൻ ഒരു വൗവ്വാൽ

പകലിൻ്റെ കിഴുക്കാം തൂക്കുകളിൽ

തലകീഴായി 

തൂങ്ങിക്കിടന്ന് 

ദിവസത്തിന്നേ നോക്കുന്നു

രാത്രിയല്ല എന്ന് സ്ഥാപിക്കുവാനുള്ള

അതിൻ്റെ ശ്രമങ്ങളിൽ

ചില റാത്തൽ ചിറകടികൾ 

വിളക്കിച്ചേർക്കുന്നു

കറുപ്പ് ചേർത്തും കുറച്ചും

ഇരുട്ട്  തൂക്കുന്നു

രഹസ്യമായി നാണം കുണുങ്ങുന്ന സൂര്യനിൽ

വീജാവരിക്കാലത്തിലേക്ക് 

സ്വകാര്യമായി തുറക്കാവുന്ന ജനാല

അതിൻ്റെ കൊളുത്ത്

ഞാത്തുന്നു

പുലരിയുടെ 

പുരാതനഭൂപടം വിടർത്തുമ്പോൾ 

ഒരു നാവികനാവും സൂര്യൻ.

കടൽ കഴിഞ്ഞ്

ഒരു ക്രിസ്‌റ്റഫർ കൊളമ്പസ് നാണം

എവിടെ വയ്ക്കണം എന്ന്

തിടുക്കപ്പെട്ട് പരതുന്നു

ഇവിടെ,

കാതുകൾ നീന്തുന്ന

ജലമാണ് ഉടൽ

എന്ന ഒരു അരയന്നത്തിൻ്റെ

നിഗമനം

ദൈവം മുഖവിലക്കെടുത്തിട്ടുണ്ടെന്ന്

തോന്നുന്നു

കാണികൾ നടന്ന് കയറുന്ന

നാടകം പോലെ

അഭിനയത്തിൻ്റെ പടവുകളിൽ

തളർന്നിരിക്കും സൂര്യൻ

തിരശ്ശീലക്ക് പിന്നിൽ

ചമയങ്ങളില്ലാത്ത പകൽ

നീന്തുന്ന അരയന്നത്തിൻ്റെ നടത്തം

ദൈവം കട്ടെടുത്ത് അരക്കെട്ടിൽ

വെക്കുന്നു

ചേമ്പിലയിൽ ജലം പോലെ

ദൈവത്തിൻ്റെ അരക്കെട്ടിൽ

തുളുമ്പും നീന്തൽ

ഒപ്പം തുളുമ്പും ഒരിറ്റ് നാണവും

കാണികളുടെ നിൽപ്പിൽ

നാടകം തുളുമ്പുന്നു

നാടകം കഴിയുമ്പോൾ

അഭിനയമെല്ലാം തുടച്ച്

കാണികൾ ഒരു നടനെ തിരിച്ച്

അണിയറയിലേക്ക് 

കൊണ്ട് വെക്കുമ്പോലെ

പകൽ

ഒരൊറ്റദൈവമേയുള്ളു

എന്ന് ഏതാണ്ട് എല്ലാ മതങ്ങളും

തല കുലുക്കി സമ്മതിച്ച വേദിയിൽ 

ദൈവം കാണി.

മതം ഓരോ മനുഷ്യരിലേക്കും

തുളുമ്പും നാടകം കണ്ടുകൊണ്ടിരിക്കുന്നു

തുളുമ്പുന്ന മതം

ദൈവം തുടക്കുന്നില്ല

കാണികൾ അറിയുന്നില്ല

ഒറ്റപ്പെട്ടവരുടെ ദൈവത്തിനെ

എവിടെയിട്ട് വെക്കും എന്ന 

ഒരു കുട്ടിയുടെ സംശയം 

നാടകത്തിനിടയിൽ പൊങ്ങിവരുന്നു

അതോ ജീവിതത്തിന്നിടയിലോ എന്ന് ദൈവം സംശയിക്കുന്നു

ദൈവം അവഗണിക്കുന്നു

ദൈവത്തിനെ പോലും നിഷേധിക്കപ്പെടുന്നവർ

എന്ന് ചീറിയിട്ടുണ്ടാവണം കാലം

കൂടുതൽ ഒറ്റപ്പെടുന്നുണ്ടാവണം ദൈവം

ചേർത്തുപിടിക്കണം എന്നാവും

ഉള്ളിൽ ആഗ്രഹം

കുട്ടിയുടേയും ദൈവത്തിൻ്റേതും

വേദിയിൽ കുട്ടികൾ ദൈവത്തേ

നടത്തിക്കൊണ്ട് പോകുന്നു

ഒറ്റപ്പെട്ടവരുടെ ദൈവത്തെ ഇട്ടു വെക്കുവാൻ ഇടം തിരഞ്ഞൊരു കുട്ടിയേ 

ദൈവം അണിയറയിൽ 

പിടിച്ചുമാറ്റുന്നു

മതത്തിൽ നിന്നും മനുഷ്യരെ 

പിടിച്ചുമാറ്റുന്ന ദൈവത്തിന് 

കുട്ടികൾ അണിയറയിൽ 

ചമയങ്ങളിടുന്നു

ദൈവം അടങ്ങിയിരിക്കുന്നു!