ഏകാന്തതയെ കുറിച്ച് അനന്തമായി

കുമ്പിൽ കുത്തി
നനച്ചെടുക്കുന്നു.
വയണയിലമണമുള്ള
ഏകാന്തത.

ഒരു പക്ഷേ നിന്റെ
ഇന്നത്തെ മൂന്നാമത്തെ
ഏകാന്തത

ആദ്യത്തേത് രണ്ടും ഞാനെടുക്കുന്നു.
അതും തോരുന്നതിനിടയ്ക്ക്

ഇരുവശത്തും മഴയുള്ള
ഒരിടവേള നീയെടുക്കുക

വിരസത ഒരില
മരം അവിടെ
അത് പൂരിപ്പിക്കാതെ വിടുന്ന
ഒരിടം

അനന്തമായ ഇടവേള അടക്കം ചെയ്ത പെട്ടി

ശവക്കുഴിയുടെ ആഴത്തിലേയ്ക്ക്
ഇറക്കിവെച്ച് തീരാത്തത്

മൺതരികൾ ചൊരിഞ്ഞു വീഴുന്ന
ഒച്ച

തരികൾ കുത്തനെവീഴുമ്പോഴും
ഒച്ചമാത്രം
ചെരിയുന്നത്

ചെരിഞ്ഞ കാത്
ചെരിവുള്ള പാട്ട്
പാട്ടിന്  നടുവിൽ
പാട്ടിനിടയിൽ കുത്തനെ
കുത്തിനിർത്തിയ നിശ്ശബ്ദത

ഓരോ വരിയിലും
പാട്ടിലും
മൺതരികൾവീഴുന്ന ശബ്ദം.

ഒരിത്തിരി ഉയരത്തിൽ
മഴ
ചതുരത്തിലെടുത്ത
കുഴിയാകുന്നു.

അനന്തമായി തോരുന്ന മഴത്തുള്ളി

അതിന്
നിന്റെ വിരലിന്റെ
വയലിൻ മണം..