അമ്പലമണിയുടെ ഒച്ചയിൽ മുഴങ്ങുന്ന ഇടി

മഴത്തുള്ളിയുടെ
പ്രതിഷ്ഠയുള്ള ക്ഷേത്രത്തിൽ
പ്രദക്ഷിണം വെച്ച്
കുളിച്ചു തൊഴാൻ വരുന്ന
 മഴയാണ് നീ

നീ ചതുരത്തിൽ വെയ്ക്കുന്ന
വലത്തിനെ വലം വെച്ച്
നിന്റെ കൊലുസ്സിന്റെ താളത്തിൽ
ജലമന്ത്രങ്ങൾ ഉരുവിട്ട്
പതിയെയൊരു
 പുഴയൊഴുകുന്നു

നീ ചവിട്ടാതെ ഒഴിഞ്ഞു പോകുന്ന
ഇടങ്ങളിൽ യഥാസ്ഥാനത്ത്
കൊത്തുപണികളോടെ
മേഘങ്ങളിൽ കൊത്തിവെച്ചിരിക്കുന്ന
ബലിക്കല്ലുകൾ

തൊഴുതു മടങ്ങുമ്പോൾ
ശീവേലിക്ക് സമയമായതു പോലെ
അമ്പലമണിയുടെ ഒച്ചയിൽ
ഒരിടി മുഴങ്ങുന്നു!