Sunday, 15 November 2015

ഒരേമഴയിലെ രണ്ടുതുള്ളികളിലെയ്ക്കു

ഒരേ മഴയിലെ
രണ്ടു തുള്ളികളിലെയ്ക്ക്
യാത്രപോകുവാൻ
കാത്തുനില്ക്കുന്ന
രണ്ടു പേരാണ് നമ്മൾ


പോകേണ്ട തുള്ളിയിലെയ്ക്കുള്ള വഴി
നിനക്കറിയില്ല

എനിക്ക് പോകാൻ പ്രത്യേകിച്ച്
തുള്ളിയൊന്നുമില്ല

അതെ മഴയത്ത് വെച്ച്
ഒരു തുള്ളി നനയാതെ
നീ എന്നോട് വഴി ചോദിക്കുന്നു

ഞാൻ അത്രയും നനഞ്ഞു
കൂടെ വന്നു
നിനക്ക് വഴി കാട്ടിത്തരുന്നു

കാട്ടി തന്ന
വഴിയിൽ നീ എന്നെകാണിക്കുവാൻ
മൊട്ടില്ലാതെ
ചെമ്പരത്തികൾ വിരിയിക്കുന്നു


ശിഖരങ്ങൾ ഇല്ലാതെ
ഇലകൾ ഇല്ലാതെ
വേരുകൾ മാത്രമുള്ള മരങ്ങൾ കാട്ടി തരുന്നു


അവസാനം ഇറങ്ങാനുള്ള തുള്ളിയിൽ
ജീവിതം ഇറ്റിച്ചു നിർത്തുമ്പോൾ;
ഒരു വാക്ക് മിണ്ടാതെ,
ഒന്ന് തോരുക പോലും ചെയ്യാതെ;
ഒരു മഴയായി നീ-
ഇറങ്ങി പോകുന്നു!

5 comments:

  1. ശിഖരങ്ങൾ ഇല്ലാതെ
    ഇലകൾ ഇല്ലാതെ
    വേരുകൾ മാത്രമുള്ള മരങ്ങൾ കാട്ടി തരുന്നു

    ReplyDelete
  2. വാക്കുകളുടെ പെരുമഴയില്‍ ഒരു ചിത്രകഥ..

    ReplyDelete
  3. ഇതിൽ വാക്കുകളുടെ ഒരു മാജിക്ക് ഉണ്ട് ,,അതിനേക്കാൾ മനോഹരമായൊരു കവിതയുമുണ്ട്...
    രണ്ടും നന്നായിരിക്കുന്നു.

    ReplyDelete
  4. മനസ്സിലേക്ക് വിഷാദരാഗമായ്
    പെയ്തുതോരുന്ന മഴത്തുള്ളികള്‍!
    ആശംസകള്‍

    ReplyDelete
  5. ഈ മഴയിലെ ഒരു തുള്ളിയായ് ഞാനുമലിഞ്ഞ് ചേരുന്നു......
    നന്മകള്‍ നേരുന്നു......

    ReplyDelete