സാവകാശത്തിൻ്റെ സാഷേകളിൽ ചാരിയിരിക്കുന്നു

പറക്കുന്ന പക്ഷികൾക്ക് 

ചില്ലറക്ക് മുറിച്ച് വാങ്ങാവുന്ന

സാഷേകളുണ്ടാവുമോ 

ആകാശത്തിന് ?

കുറവാണ്

ചുറ്റുപാടുകളിലേക്കുള്ള

അലിയൽ

നടത്തത്തിൽ കൊരുത്തിട്ടിട്ടുണ്ട്

എന്നേയുള്ളു

തിളയെന്നും കുമിളയെന്നുമാണ്

വേർതിരിവുകൾ

ഉടലുകൾ സമീപനങ്ങൾ

എന്നാവുകിൽ

ഞാൻ തന്നെയാവണം 

എൻ്റെ പഴക്കത്തിൻ്റെ സാഷേ

നടത്തവും നൃത്തവും 

എന്നാണ് തിള.

വെച്ചിട്ടില്ലാത്ത നൃത്തങ്ങളിൽ,

ചുവടുകൾ കുമിളകൾ

ശേഖരങ്ങളുടേതാണ് 

നിലയും വിലയും

നൃത്തത്തിൻ്റെ സാഷേ

നടത്തം വകഞ്ഞ് 

ചുവടുകളിലേക്കും

മുദ്രകളിലേക്കുമുള്ള

അതിൻ്റെ കലരൽ

എൻ്റേതോ നിൻ്റേതോ

എന്നൊന്നുന്നില്ല ചുവടുകൾ

ആരുടേതുമല്ലാത്തതുമാകാം എന്നാലും

വെച്ചിട്ടുണ്ടോ എന്നാവും ഉടലുകൾ

എത്തിനോക്കുക

ഒരു പക്ഷേ കുറച്ച് നേരം,

ചൂട് തങ്ങിനിൽക്കുമിടം

ഉടലാവുന്നതുമങ്ങിനാവാം

ചിറക് നൂൽക്കുന്ന പക്ഷി

ആകാശം കൊണ്ട് ഒരു,

പഴഞ്ചൻ ചർക്കയാണെന്ന

അതിൻ്റെ തോന്നൽ

ചുറ്റും ഉടയുന്ന ഗാന്ധിജിയേ

ഉടുത്തുനിൽക്കും പ്രതിമകൾ

അതിൻ്റെ കണ്ണടയിൽ

കെട്ടിക്കിടക്കും ഇനിയും ഉടയാത്ത നാളെയുടെ നിശ്ചലത

നാളെയുടെ സാഷേകളാണ്

കലണ്ടർ നിറയേ

ഇന്നലെയിലേക്കുള്ള അതിൻ്റെ അലിയൽ ഇനിയും പൂർണ്ണമായും ചേർത്തിട്ടില്ല

ഒരു ഉടലിലേക്കും തീയതികളിലേക്കും

ഒരു സമാധാനത്തിന് 

സമാധാനത്തിൽ,

വെള്ള ചേർത്ത് ശീലിച്ചവരാണ് ചുറ്റും

കുറുകുന്നതിൻ്റെ ഉപ്പ്,

പ്രാവുകൾ, പറക്കുമ്പോഴും

പാകത്തിന് മാത്രം ചേർക്കുന്നു

ഉണ്ടാവില്ലേ പക്ഷികൾക്കും

സന്ദർശകർ

അവയുടെ ദേശാടനങ്ങൾക്കെങ്കിലും?

ഉണ്ടാവില്ലേ സാഷേകൾ

ആകാശത്തിന്?

അതിൻ്റെ സാവകാശങ്ങൾക്ക്

അതിൻ്റേത് മാത്രമായ

സമാധാനത്തിന്  ?

നീലനിറങ്ങൾക്കെങ്കിലും?

വെള്ളം ചേർത്ത  

സമാധാനമാണ് ചുറ്റും

ഉപദ്വീപ് എന്ന് വിളിക്കും

ഒരു പക്ഷേ 

വെള്ളം ചേർത്ത ദ്വീപുകളുടെ 

സമാഹാരം 

ദ്വീപുകളുടെ സാഷേ

ഉദയത്തിൻ്റെ സാഷെയേ

ഉന്മാദത്തിൻ്റെ സാഷെയേ

സൂര്യനെന്ന് വിളിച്ച്

കിഴക്കിൻ്റെ നൂലിൽ പണ്ടേ, കെട്ടിയിറക്കിയ നാടാണ്

ഇരുന്ന് കുടിക്കാം

നൃത്തം വെക്കുന്നവരാരുമില്ല ചുറ്റിലും

അപൂർണ്ണതകളുടെ അലിയലാവണം

ഉടലിൽ ചേർക്കാവുന്ന വണ്ണം

അരികിലുണ്ട്

നെടുവീർപ്പിൻ്റെ സാഷേകൾ

നിർമ്മാണം പൂർത്തിയാകാത്ത

ആകാശമാവണം മുകളിൽ

മേഘത്തിൻ്റെ മേശിരി

നീലനിറങ്ങളിൽ അതിൻ്റെ പലവിധ ആലോചനകൾ

ആലോചനകൾ സാഷേകൾ

എൻ്റെ തൂവൽ

അതിനുമുണ്ട് ഭാരം കുറഞ്ഞ

നിറങ്ങൾ ചാന്തുകൾ

കട്ടയിട്ട് കെട്ടാത്ത ആലോചനകളുടെ

നൂൽക്കെട്ടുകൾ

പറക്കുന്നതിലേക്ക് അലിയുന്നില്ല 

എന്നൊരു പക്ഷിയുറപ്പ് 

അതിൻ്റെ പ്രതീക്ഷകൾ പ്രതിമകൾ

പ്രതിമകൾ, നഗ്നതയുടെ സാഷേകൾ

ഉണ്ടാവുമോ സാഷേകൾ കടലിന് ? ഉലയുമ്പോൾ കപ്പലുകൾ ചുറ്റും നിലത്തേക്കിടാവുന്നത്

ഭൂമിയുടെ ഭ്രമണഗ്രന്ധിയിൽ

ഭ്രമണഅഭയങ്ങളിൽ തലവെച്ച് കിടക്കുകയായിരുന്നു

ഒന്ന് ഉലഞ്ഞിട്ടുണ്ട്

തുടരേണ്ടതുണ്ട് പരതുന്നതിൽ 

തിരയേണ്ടതുണ്ട്

നിലത്തേക്കിടാൻ നാളെയുടെ

ഭ്രമണസാഷേകൾ

ഉടൽ നിറയേ പ്രണയത്തിൻ്റെ

സാഷേകൾ ഉള്ളവളാണ് അരികിൽ

തൽക്കാലം

തിളക്കുന്ന വെള്ളത്തിൽ,

തേയിലമണം വിട്ടുമാറാത്ത ഒരു ചായപ്പത്തി ഇട്ടുവെക്കുമ്പോലെ

പിൻവലിക്കാവുന്ന ആകാശത്തിൽ

പക്ഷിയുടെ സാഷേ ചേർക്കുന്നു

നീലനിറത്തിൻ്റെ സാഷേകളിൽ

ആകാശം ചാരിയിരിക്കും പോലെ

സാവകാശത്തിൻ്റെ സാഷേകളിൽ ചാരിയിരിക്കുന്നു.