Friday, 18 August 2017

നൃത്തം കുട്ടി കവിത എന്നീ വരികൾ

നടന്നുകൊണ്ടിരിക്കുന്ന നൃത്തം
വകഞ്ഞ് മാറ്റി
കഴിഞ്ഞോ കഴിഞ്ഞോ
എന്നൊരു എത്തിനോട്ടം
സ്വയം
നൃത്തം വെച്ചുകൊണ്ടിരിക്കുന്ന
കുട്ടി തന്നെ
ചെയ്യുന്നത് കണ്ടിട്ടില്ലേ?

ആ കുട്ടി വെച്ചുകൊണ്ടിരിക്കുന്ന
നൃത്തം
എന്റെ ജീവിതമാണ്

ആ കുട്ടിയാരാണെന്നറിയുവാനുള്ള
എത്തിനോട്ടം
ഒരു വായനകൊണ്ട് പോലും
പൂരിപ്പിക്കാതിട്ടിരിക്കുന്ന
ഈ കവിതയാണ്

ഇനി ഞാനെന്തു പറഞ്ഞ്
സമാധാനിപ്പിക്കും
എന്റെ കവിതയിലെ ഉപമയേ!

1 comment: