പെയ്ത്തുബുദ്ധൻ

യാത്രയേ വാക്ക് 

ഒരു മേഘത്തിൽ എടുത്ത് വെക്കുമ്പോലെ

കൂടെ വരുന്ന മേഘം എന്ന് 

ചെയ്ത യാത്രയേ ലഘൂകരിക്കുന്നു

അമ്പിളിക്കല ഇട്ടുവെക്കും

മാനത്തിൻ്റെ ജാർ

ഇടക്ക് അകലം ഇട്ട്

കൂടേ നക്ഷത്രങ്ങൾ 

അടുപ്പം  ജലസ്പർശനം

വിരൽത്തുമ്പ് കൊരുക്കുന്നു

മുല്ലകൾക്ക് മാത്രമായി വെളുക്കുന്ന

നേരം

യാത്രയുടെ ഒരു തണുത്ത

ഐസ് ക്യൂബ്

യാത്രയേക്കാൾ തണുത്ത

ജലത്തിൽ

ചലനത്തിനേക്കാൾ നേർപ്പിച്ച്

യാത്രയിലേക്ക് യാത്രക്കാരൻ

അലിഞ്ഞുചേരുന്നു

യാത്രയുടെ ഐസ് ക്യൂബുകൾ,

അലിയുന്ന രണ്ട് പേരിലേക്ക്

ബുദ്ധൻ ശ്വസിച്ചുവെച്ച നിശ്വാസങ്ങളിൽ,

ഏറ്റവും ധ്യാനാത്മകമായ ഒന്ന്

തിരഞ്ഞെടുക്കുന്നു

ശ്വാസത്തിൽ നിന്നിറുക്കാതെ

ഏറ്റവും ശാന്തമായ അന്തരീക്ഷത്തിൽ ഷോക്കേസിൽ സൂക്ഷിക്കുന്നു

എന്നെങ്കിലും ബുദ്ധൻ ഒരു നൃത്തം

വെച്ചിട്ടുണ്ടെങ്കിൽ 

അതിലേ

അത്യന്തം ഐശ്ചികമായ മുദ്ര

പിന്നീട് എന്നെങ്കിലും അത്രയും

വിശദമായി പ്രതിപാദിക്കപ്പെട്ട 

രണ്ട് ചുവടുകൾ എന്ന വണ്ണം

ഉടൽ,

ചെയ്ത യാത്രയുടെ ഐസ്ക്യൂബുകൾ

പൂർവ്വമാതൃകകൾ ഉള്ളതിനാൽ

വേനൽക്കാലങ്ങൾ

പൂർവ്വസൂര്യനെ തിരഞ്ഞ്

അന്നന്നത്തെ സൂര്യനും

ഒരു മേഘം ബുദ്ധനിൽ ചെന്ന് തട്ടി

തിരിച്ചു പോകും

മാനം അത് പെയ്യാതെ എടുത്തുവെക്കും

കലരാതിരുന്നാൽ നീല

നിറമല്ലാതാകും പോലെ,

ഉറപ്പ്.

ധ്യാനത്തിൻ്റെ പെയ്ത്തുബുദ്ധനേ

എന്ന് അഭിസംബോധന കലർന്ന

മേഘങ്ങൾ

ആകാശത്തിൻ്റെ ഉത്തരമാകുവാൻ

നിന്ന് കൊടുക്കുന്നു

കുരുവിമറുകുകൾ  കൊത്തിതിന്നുന്നു

മറുകുള്ള വേനലുകൾ

എന്ന് ഇപ്പോൾ ഉത്തരങ്ങൾ

ഉമ്മ വെയ്ക്കുവാൻ ഒരിടം കിട്ടിയാൽ

കിടക്കുവാൻ ഒരിടം കിട്ടിയപോലെ

എന്ന് കരുതുന്ന യാത്രികനാവുന്നു.