ഒരു നുള്ള് കാത്തിരിപ്പ്

ഒരു നുള്ള് കാത്തിരിപ്പ് 

ഒരു തുള്ളിയിലെടുത്ത് വെച്ച്

തോരുന്നതിൽ

പിടിച്ചുനിൽക്കുന്ന മഴ

അടയുന്നതിന്റെ മൈലാഞ്ചിയിട്ട

തൊട്ടാവാടികൾ

തുറന്നുകാട്ടും

കൈകളിലെ ശലഭചലനങ്ങൾ

തൊടുമ്പോഴേയ്ക്കും 

ഉണങ്ങാത്ത മാതിരി 

ചലനം ഇമകളിൽ

പിൻവലിയ്ക്കും ഇലകൾ

കാതിൽ ഒരു നുള്ളിന്റെ മൂളൽ

കാത്തിരിപ്പ് ഒരു മുള്ളിലെടുത്ത്

നോവ് കൊണ്ടൊരു

പനിനീർപ്പൂവുണ്ടാക്കുകയായിരുന്നു

അവൾ

ഒരു തുടർച്ചയാവുന്നു കാത്തിരിപ്പ്

അവൾക്ക് മുന്നിൽ

തോർച്ച ഒരു തട്ടം 

മഴ പിടിച്ചിടുന്നത്

പൂത്തിറങ്ങും മിനുക്കം

അലുക്ക് പോലെ പിടിച്ചിട്ട്

ഇരുട്ടിനും പുറത്തിറങ്ങും മിന്നാമിനുങ്ങി

മെല്ലേ ഒരു അലുക്കാവുന്നു കാത്തിരിപ്പ്

അത് പിടിച്ചിട്ട് 

അവൾ പുറത്തേയ്ക്കിറങ്ങുന്നു

പടർന്നുകയറും

കാത്തിരിപ്പിന്റെ വള്ളികൾ

കാത്തിരിയ്ക്കുന്നതിനിടയിൽ

കാത്തിരിയ്ക്കുന്നത് ആരെയാണെന്ന്

മറന്നുപോകുന്ന ഒരാൾ

എന്നിട്ടും കാത്തിരിപ്പിൽ തുടരുന്ന അയാൾ

കാത്തിരിപ്പ് വന്ന് അയാളെ മൂടുന്നതാവണം

അയാൾ കാത്തിരിപ്പിന്റെ കാട് 

കേട്ടിട്ടുണ്ടോ?

കാത്തിരിപ്പ് വന്ന്

കാത്തിരിപ്പിൽ മുട്ടുന്ന സ്വരം

ചാട്ടം കാത്തിരിയ്ക്കും പച്ചത്തുള്ളനെ

പച്ചനിറത്തിൽ വന്ന് ചാട്ടം തൊടുമ്പോൾ

ചാടാൻ മറന്നുപോകുന്നത് പോലെ

അണിഞ്ഞിട്ടുണ്ടാവണം

മഴത്തുള്ളികൾ ഓരോന്നു

തൊടുന്നുണ്ട് ആരോ

എന്നിട്ടും

വാടാൻ മറന്നുപോകും

തൊട്ടാവാടി പോലെ 

അത്

കാത്തിരിപ്പിലേയ്ക്ക് മാത്രം

കൂടുതൽ പടരുന്നു

കാത്തിരിപ്പിലേയ്ക്ക് മടങ്ങുന്നു

സംഗീതമായിത്തുടങ്ങിയിട്ടുണ്ട്

മഴത്തോൽ വലിച്ചുകെട്ടിയ

ആകാശത്തിന്റെ മിഴാവിൽ

മഞ്ഞുതുള്ളികൾ തൊടും ശബ്ദം 

അയാൾ

ചകോരപ്പക്ഷികളുടെ നടത്തം

ശേഖരിയ്ക്കുന്നു

അവൾ

നാലും കാത്തിരിപ്പാവുന്ന

ഒരു വെറ്റിലച്ചെല്ലം

ശരിയൊരു വെറ്റില

മുറുക്കാത്തത് കൊണ്ട് കാലം

നീക്കിവെയ്ക്കുന്ന

അതിലെ സത്യം

വാക്കിന് താഴെ

വാടാത്ത കാത്തിരിപ്പ്‌ കൊണ്ട് നിർമ്മിച്ച

പുതിയൊരു വെറ്റില

അതിന്റെ പച്ചമൂളൽ

2

കാത്തിരിപ്പ്,

പക്ഷികൾ നിർമ്മിയ്ക്കുന്ന ആകാശത്തിന്റെ 

ഒരു ഭാഗമാണെന്ന്

അവൾ

ഒരു തലയാട്ടൽ അധികം നിർമ്മിച്ച്

സമ്മതം ഒരു താളമാണെന്ന് ഞാൻ

മേഘങ്ങൾ വായിക്കും ബ്യൂഗിൾ

താളത്തിൽ കടന്നുപോകും

ഒരു ബാൻഡാവുന്നു ആകാശം

കാത്തിരിപ്പ് മനുഷ്യന്റെ ആകൃതിയുള്ള

താക്കോലുകളാണെന്ന് 

അതുപയോഗിച്ച് അവർ തുറന്നുകയറാത്ത ഇടങ്ങളില്ലെന്ന്

കലപിലകൾ കൊണ്ട് 

അഭിപ്രായം മറച്ച് കിളികൾ

ആകാശം നിർമ്മിച്ച 

പക്ഷിയാണ് കാത്തിരിപ്പ് എന്ന് 

അതിലൊരു കിളി

ആകാശത്തിന് എത്താനാവാത്ത

ഉയരങ്ങളിൽ

നീലനിറം കുറച്ച് കൂടിയ ആകാശം 

ആ കിളിയുടെ മാത്രം വായ പൊത്തുന്നു.