രാജ്യമെന്ന വിധം രാവണൻ രൂപപ്പെടുന്ന വിധം

ഒന്നോ രണ്ടോ മുലകൾക്ക് കീഴേ

പത്തുതലവെച്ച്

രണ്ടോ മൂന്നോ മുഖങ്ങളിൽ

പാലുണ്ട്

മുലകുടിച്ച്

മുട്ടിലിഴഞ്ഞ് 

കിഴക്കോട്ട് മാത്രം പോകുന്ന

അതൃപ്തികളുടെ ചുണ്ടുള്ള

കുഞ്ഞുരാവണൻ

പത്ത് വായിൽ നിന്നും

വാരികളഞ്ഞ

മണ്ണിന്റെ നുരയും പതയും

മുട്ടിന് താഴെ 

ലങ്കയാവുന്നു

പത്ത് കുഞ്ഞിക്കടികൾ

അതിൽ ഈരണ്ട്‌ പല്ലിന്റെ

കുഞ്ഞിപ്പാടുകൾ

കാലുകളിൽ കൂടെ 

മുട്ടിലിഴയുന്ന കുഞ്ഞുലങ്ക

കിലുക്കങ്ങളുടെ

കാൽത്തളക്കടൽ

കൈകളിൽ

കുഞ്ഞുവിരലുകൾക്ക് താഴേ

സ്വർണ്ണനിറത്തിൽ

ലങ്കയുടെ മണ്ണ്

വീണയുടെ ഈണവും

മുട്ടിലിഴയുന്ന കുഞ്ഞ്

ഇരിയ്ക്കുമ്പോൾ രൂപപ്പെടുന്ന

ഒരു രാജ്യമുണ്ട്

അഴിച്ചിട്ട 

കലമാൻ കണ്ണുകൾക്ക് താഴെ

ചിലത് കടൽക്കരയിലും

നദീതടങ്ങളിലും

യുഗങ്ങൾക്കരികിൽ

ചിലപ്പോൾ

ഉഴവുചാലിൽ പോലും.