ചിങ്ങമെന്ന ഒന്ന്

ഇന്നത്തെ രണ്ടാമത്തെ രാവിലെ
മാവില പോലെത്തെ ഒന്ന്

അഴിച്ചിറക്കുന്നു,
സൂര്യനെന്നു പേരുള്ള ആദ്യത്തെ
പയ്യിനെ

ചുറ്റും തീയതികളുടെ കച്ചി
അരികിൽ മാസത്തിന്റെ തുറു.

കിഴക്ക്,
മൂന്നാമത്തെ കാല് വീണ
തൊഴുത്ത്

തൊടിയിൽ
ഇന്നലെ പെയ്ത മഴ, അതിൽ
കർക്കിടകം, ഇനിയും കലക്കിക്കൊടുക്കുവാനാകാത്ത കാടി

മട എന്നൊന്നുണ്ടായില്ല
വീഴുവാൻ
നടുക്ക്,
നാല് വരമ്പുകൾ കൂട്ടിക്കെട്ടിയെടുത്ത പാടവും

വെയിൽ,
പയ്യിന്റെ കഴുത്തിൽ താഴേയ്ക്ക് വീണ
ആട
ഞാനതു മെല്ലേ തഴുകിയിരിയ്ക്കുന്നു.

ചുറ്റിലും സമൃദ്ധി

ചിങ്ങമാണ്
ഇനിയും പച്ചകെട്ടിട്ടില്ലാത്ത
ഇലയുടെ അറ്റത്ത്
രണ്ട് കറികളുടെ മാത്രം കുറവുള്ള ദാരിദ്ര്യം
ഉച്ചയാകുമായിരിയ്ക്കും.