ചതുര ചുംബനങ്ങൾ

ചതുരനുണകൾ എന്ന് ചുണ്ടുകൾ

ചുംബനത്തിൻ്റെ വക്കോളം വന്ന് മടങ്ങിപ്പോയി

ഏറ്റവും കൂടുതൽ ചുംബനങ്ങൾ മടക്കങ്ങൾ തന്നെ ഒളിപ്പിച്ചു

ഒഴിഞ്ഞ കാൻ പോലെ

ചെയ്തുവെച്ച പശ്ചാത്തലസംഗീതങ്ങൾ 

തട്ടിത്തെറിപ്പിച്ച് പാട്ടുകൾ 

ഒന്നൊന്നായി കടന്നുപോയി

ഒപ്പം ഒന്നും തട്ടിത്തെറിപ്പിച്ചില്ലെങ്കിലും ഉടലുകളും നെടുവീർപ്പുകളുടെ

കാനുകൾ എന്ന പോലെ

പിന്നേയും

ബാക്ക് ഗ്രൗണ്ട് സ്കോറുകൾ എന്ന് 

അവ ഉടലുകളിൽ പറന്നുവന്നിരുന്നു കുറുകി

കെട്ടിക്കിടക്കുന്ന വെള്ളം 

പെട്ടെന്ന് ശാന്തമായി കടന്നുപോകുമ്പോൾ വാഹനങ്ങൾ

വെള്ളം തെറിപ്പിക്കുന്നത് പോലെ

ചുംബനം കഴിഞ്ഞ് മുഖം 

കാതുകൾ നമ്മുടെ ഉടലിലുകളിലേക്ക് തെറിപ്പിക്കുന്നു

കെട്ടിക്കിടക്കുന്ന വെള്ളത്തിലൂടെ കടന്നുപോകുമ്പോൾ

വാഹനങ്ങൾ

വേഗത കുറക്കുന്നത് പോലെ

ചുംബനം പെട്ടെന്ന് 

അതിൻ്റെ വേഗത അതിശയകരമായി കുറക്കുന്നതനുഭവപ്പെട്ടു

ശാന്തതയോടെ ചുണ്ടുകൾ  

ഉടലിലൂടെ കടന്നുപോകുന്നു

ഹൃദയത്തിലേക്ക് ഒരു 

മിടിപ്പിറക്കുന്നത് പോലെ 

ഒരു പക്ഷേ അതിലും പതിയേ,

സാവകാശം

ശംഖുപുഷ്പങ്ങളിൽ കാറ്റ് 

കയറി ഇറങ്ങുമ്പോലെ 

പൂക്കളേ അവിടെ നിർത്തി

വള്ളികൾ മാത്രം എന്ന്

ഒന്ന് ഉയർന്നുതാണു

ഒപ്പം നിർന്നിമേഷതയുടെ ഋതുവും

നഗരത്തിൻ്റെ എല്ലാ തിരക്കിൻ്റെയും

ഓരത്ത് വന്ന് നിന്ന്

തിരക്കുകൾ മാടിയൊതുക്കി

പ്രണയത്തിലേക്ക് വന്ന്

അതിൻ്റെ അവധാനതകളിലേക്ക്

ചേർന്ന് നിന്ന് 

മറ്റൊരു തിരക്കിലേക്ക്

തിരക്കിട്ട് ഓടിക്കയറേണ്ടവരാണ്

നമ്മൾ

നമ്മൾ ചുംബനങ്ങളിൽ പോലും

നിന്ന് യാത്ര ചെയ്യുന്നു

എന്നായി കാതുകൾ

ചുംബനങ്ങളുടെ വയലറ്റ് സെൾഫികൾ ഉടലുകൾക്കൊപ്പം പാറിപ്പോയി

തൊട്ട് തൊട്ട് നമ്മുടെ ഖേദവിരൽത്തുമ്പ്

അവയുടെ അവസാനം കെട്ടിയിട്ട സ്പർശനങ്ങളിൽ ചെന്ന് തട്ടിനിൽക്കുന്നു

ചുംബനങ്ങൾ വൈകുന്നതിനുള്ള

ക്ഷമാപണങ്ങൾ എന്നായി അവൾ

അടുത്ത ചുംബനത്തിൽ ഞാനത്

നിശ്ശബ്ദം ശരിവെച്ചു

നിങ്ങൾ ചെയ്തില്ലെങ്കിലും

തെറ്റുകൾ അവിടുണ്ട് എന്നായി

ഉടലുകൾ

നമ്മൾ തെറ്റ് ചെയ്യാത്ത രണ്ട് പേരായി

പൂക്കളിൽ പോയി വിരിയുന്നു

ഞാനും അവളും എന്ന് 

എല്ലാ ചുംബനങ്ങൾക്കും പിന്നാലെയാവുന്ന ഞങ്ങൾ

വേർപെടും മുമ്പ്

ശരദിന്ദു മലർദീപനാളം നീട്ടി

എന്ന പാട്ട് അവസാനിക്കും പോലെ

നമ്മൾ ഒരു ചുംബനത്തിൽ വീണ്ടും

ചാരി നിൽക്കുന്നു