രണ്ടാമത്തെ നായയെന്നോ മറ്റോ കവിത

ഭക്തി, ഘ്രാണശക്തിയുള്ള ഒരു വാക്കാണെങ്കിൽ

പ്രാദേശികമായി ഭാഷ

അതിൻ്റെ യജമാനനാകും ഇടങ്ങളിൽ

ദൈവത്തിൻ്റെ നായയാവണം 

എന്നിട്ടും, എന്ന വാക്ക് 

നിഘണ്ടു അപ്പോഴും അതിൻ്റെ തുടലല്ല

എറിഞ്ഞ കല്ലുകളാൽ 

ദൈവത്തിൻ്റെ മാവിലെ

പഴുത്തമാങ്ങകൾ 

(വിളഞ്ഞതാവാനും മതി)

കിളികൊത്തലുകൾ കഴിഞ്ഞുപോലും

നിലത്തുവീഴുന്നില്ല

ഒരു കാലത്തും 

മറ്റൊരു കല്ലാൽ നക്കപ്പെടുന്നില്ല

മധുരം രോമമാകുന്ന ഇടങ്ങളിൽ

അണ്ടിക്കോട്ടയായി നായകൾ

ഓരോ മാങ്ങയിലും പതുങ്ങി ഇരിക്കുന്ന

ഇടങ്ങളിൽ

വളർത്തുനായകൾ 

കണ്ണുകൾ

രോമങ്ങളിൽ പൊതിഞ്ഞ് സൂക്ഷിക്കും

വണ്ണം

ദൈവത്തിൻ്റെ വിരലുകൾ

രോമങ്ങളിൽ ഇടകലരുന്നു

ലാളനകളിൽ സൂക്ഷിക്കപ്പെടുന്നു

മനുഷ്യരെ വകഞ്ഞ്

വളർത്തുമൃഗങ്ങളിൽ 

ദൈവം ലാളനകൾ 

എടുക്കുകയും കൊടുക്കുകയും ചെയ്യുന്നിടത്ത്

അതും സാഹിത്യത്തേക്കാൾ സൂക്ഷമമായി

ദൈവവും മനുഷ്യരും

നൃത്തം ഉടലുകളിൽ പൂഴ്ത്തിവെക്കും

ഇടങ്ങളിൽ

ദൈവത്തിൻ്റെ നാവ് ഒരു മുദ്രകളിലും

പരസ്യമായി ഇടപെടുന്നില്ല

ചലനങ്ങൾ രോമങ്ങളല്ല

അപ്പോഴും ദൈവമേ 

നിൻ്റെ നായ എന്ന് ഞാൻ

കവിതകളിൽ

മധുരത്തെ ഓമനിക്കുന്നു

അത് വേറെ കാര്യം

എന്നാലും 

വിശ്വസിക്കണം, പകൽ ഒരു ദർഘാസ്- പരസ്യമാകുന്നിടത്ത്

ഞാൻ വേനലിൻ്റെ സഹായി

രോമങ്ങളുള്ള സൂര്യൻ,

ഒരു അടങ്കൽ തുക.

എൻ്റെ വിരലുകൾ നിൻ്റെ നായയുടെ

രോമങ്ങളല്ല

അതിൻ്റെ വാലാട്ടലിൽ 

രാഷ്ട്രീയ ലക്ഷ്യങ്ങളില്ല

ഞാൻ ആണയിടുന്നു

ദൈവമേ 

അതിനി ഏത് ഭാഷയിൽ എഴുതിയാലും

ഉറപ്പ്,

നിൻ്റെ രണ്ടാമത്തെ നായയല്ല

എൻ്റെ കവിത!