മനുഷ്യത്തത്തേക്കുറിച്ച് ഏയ് അല്ല ആശങ്കയേ കുറിച്ച് അതിലും നിഷ്ക്കളങ്കമായി

തന്നേക്കാൾ മനുഷ്യത്വമുള്ള ഒരാളാൽ

കൊല്ലപ്പെടും വരെ

ഉറിയിലെ വെണ്ണ പോലെ

എന്നേക്കാൾ ഉയരത്തിൽ സൂക്ഷിച്ചിരുന്നു 

എൻ്റെ മനുഷ്യത്വം 

എന്നും ഒരു വെണ്ണയായിരുന്നു

മനുഷ്യത്വം അത് മനുഷ്യരൂപത്തിൽ

ഉരുകി

ഉരുകാത്തത് മതങ്ങൾ

പുസ്തകങ്ങളിൽ

ആദിമകാലം മുതൽ എടുത്തുവെച്ചു

പലവട്ടം ചോദ്യം ചെയ്യപ്പെട്ടു

എൻ്റെ മനുഷ്യത്വം 

അപ്പോഴൊക്കെ  

ഉറിയിൽ ആടി മനുഷ്യത്വം

അതിന് മുന്നിൽ

തലകുനിച്ച് നിന്നു ജീവിതം

ഇന്നലെ 

ചോദ്യം ചെയ്യപ്പെട്ട നിലാവ്

പുതിയ പകൽ പോലെ

പിന്നേയും കാണപ്പെട്ടു

ഇരുട്ടിൻ്റെ കലങ്ങൾ

ഉടൽ എന്നൊട്ടി

രാത്രിയിൽ തട്ടി അവ 

പിന്നെയോ എന്ന് വീണ്ടും ഉടഞ്ഞു

എന്നേക്കാൾ മനുഷ്യത്വമുള്ളവരുടെ ഇടയിൽ ജീവിച്ചിരിക്കേണ്ടി വരുന്ന

അപകർഷതാ ബോധത്തേക്കാൾ 

ഉയരത്തിലല്ല എൻ്റെ ജീവൻ

എന്നെനിക്ക് പലവട്ടം ബോധ്യപ്പെട്ടു

അപ്പോഴും  

മനുഷ്യത്വത്തിന് മുമ്പിൽ 

ഒരിത്തിരി മന:സ്സമാധാനത്തിനായി കെഞ്ചി 

മനുഷ്യത്വമില്ലാത്തതിൻ്റെ പേരിൽ 

ഏത് നിമിഷവും

നഷ്ടപ്പെട്ടേക്കാവുന്ന ജീവൻ

ഏത് നിമിഷവും എടുക്കാവുന്ന ഒന്നായി അപ്പോഴും ഉറിയിലാടി മനുഷ്യത്വം

ആരുടേതാണെന്ന് അറിയാത്ത വണ്ണം

ആരും എടുക്കാതെ കൂടുതൽ ഉയരങ്ങളിൽ സുരക്ഷിതമായി തുടർന്നു

മനുഷ്യത്വം

മനുഷ്യത്വം മൃഗങ്ങളുടെ രൂപത്തിൽ

അപ്പോഴും പലവട്ടം കാടിറങ്ങി

മതങ്ങളിൽ 

പ്രത്യയശാസ്ത്രങ്ങളിൽ 

നിയമങ്ങളിൽ

ആദിമനുഷ്യത്വം തുടർന്നു

മതങ്ങൾ പലവട്ടം എടുത്ത്

ആഘോഷങ്ങൾ പലവട്ടം എടുത്തു

എന്നിട്ടും

ആർക്കും കൊടുക്കാതെ 

കൂടുതൽ അളവിൽ

കൂടുതൽ ഉയരത്തിൽ

തിരിച്ചുവെച്ചു കൂടുതൽ മനുഷ്യത്വം

മതം ഇടക്ക് വെച്ച 

അപകർഷതാബോധത്തിൻ്റെ ബർഗർ 

അപ്പോഴും രാജ്യം

ഇടക്ക് നീട്ടി

തിരിച്ചടി നേരിട്ടു അപ്പോഴൊക്കെ പൗരബോധം 

ആയിരം കുറ്റവാളികൾ രക്ഷപെട്ടാലും

ഒരു നിരപരാധി പോലും ശിക്ഷിക്കപ്പെടാൻ പാടില്ല എന്ന 

മനുഷ്യത്വപരതയിൽ ചവുട്ടി

നിയമം നിൽക്കുന്ന നാട്ടിൽ

എൻ്റെ തലയിൽ ചവിട്ടി ആയിരം വട്ടം

കടന്നുപോയി

പലയിനം കുറ്റവാളികൾ

അതും പലവട്ടം  

കൂടുതൽ നിഷ്ക്കളങ്കമായി

മതങ്ങൾ

അവ ഒളിച്ചു കടത്തി 

മതത്തിലേക്കുള്ള മനുഷ്യത്വം

ശിക്ഷിക്കപ്പെടാത്ത അക്രമികൾ

മനുഷ്യത്വത്തിൽ മുറുകേ പിടിച്ചു

ജീവിതങ്ങൾക്ക് കുറുകേ ചാടി

ഒരു നിരപരാധി ആയിരം കുറ്റവാളികൾക്ക് പകരം നീക്കിവെക്കാവുന്ന കരുവായി

നുണക്കുഴിയുള്ള നിയമം

ഓരോ തവണയും നീതി ചവച്ചു

അതാസ്വദിച്ചു

ആയിരം കുറ്റവാളികൾക്ക്

രക്ഷപെടാൻ കെട്ടിയ ഇരയായി

ഒരു നിരപരാധി അവിടെ തുടർന്നു

അതൊരു പുതിയ ആയിരം കുറ്റവാളികളെ സൃഷ്ടിക്കും വരെ

തുറന്ന് വിടും വരെ

ഒരു നിരപരാധിയേ മുൻനിർത്തി

ആയിരത്തിയൊന്നു കുറ്റവാളികൾക്ക് രക്ഷപെടാൻ പരവതാനി വിരിക്കുന്ന

സംവിധാനത്തിൽ

അവരാൽ കൊല്ലപ്പെട്ട

അവരാൽ കൊല്ലപ്പെട്ടേക്കാവുന്ന

അവരാൽ ചതിക്കപ്പെട്ട

അവരാൽ ചതിക്കപ്പെട്ടേക്കാവുന്ന

അവരാൽ കഷ്ടനഷ്ടങ്ങൾ അനുഭവിച്ച

അവരാൽ കഷ്ടനഷ്ടങ്ങൾ അനുഭവിച്ചേക്കാവുന്ന

അവരാൽ മാനഹാനികൾ ആക്രമണ ഭീഷണികൾ ഉപദ്രവങ്ങൾ

നേരിട്ടേക്കാവുന്ന പതിനായിരക്കണക്കിന് 

ആൾക്കാർ നോക്കുകുത്തികളായി

അതിലൊരാളായി ഞാനും

കൂടുതൽ നിരപരാധിത്വത്തിലേക്ക് കയറി നിന്നു

അനീതികൾ എനിക്ക് ചുറ്റും

പെറ്റുപെരുകി

പൊതുവിൽ മനുഷ്യത്വം,

അനീതികൾ

ഒളിച്ചുകടത്താനുള്ള മറയായി

ഒരു വാക്കിൻ്റെ പരപ്പല്ല നീതി

പാതി വെടിയുണ്ടകൾ കൊണ്ട 

നിയമ പുസ്തകത്തിൻ്റെ പുറഞ്ചട്ടകൾ

മഹാത്മാക്കളുടെ ചിത്രങ്ങൾ വെച്ച്

പ്രതിമകൾ വെച്ച് മറച്ചു

മാറ്റങ്ങളെ സമർത്ഥമായി പ്രതിരോധിച്ചു

തീവ്രവാദത്തിന് കുടപിടിക്കുന്ന ദൈവമേ

മിതവാദികളുടെ മൃതദേഹങ്ങളിൽ

വെയിൽ കൊള്ളാതെ നോക്കണേ

എന്ന എൻ്റെ പ്രാർത്ഥന

പലവട്ടം കേട്ട് ദൈവം ശബ്ദവോട്ടിനിട്ട് 

നിശ്ശബ്ദമായി തള്ളി

തീവ്രവാദത്തിന്നെതിരെ എന്തെങ്കിലും

പറഞ്ഞായിരുന്നോ

ഞാൻ മതത്തിന്നു നേരെ മൈക്ക്

നീട്ടുന്നു

അനീതികൾക്കെതിരെ എന്തെങ്കിലും

ചെയ്തായിരുന്നോ

നീട്ടിയ മൈക്ക്

രാജ്യം ഓഫ് ചെയ്യുന്നു

ജനാധിപത്യം ഓൺ ചെയ്യുന്നു

തീവ്രവാദത്തിന് മതമല്ല

യുദ്ധത്തിന് മതമുണ്ടോ രാജ്യമുണ്ടോ

മതത്തിന് ജീവിച്ചിരിക്കുന്ന ഇരകളെ കിട്ടുന്നു

യുദ്ധത്തിന് മരിച്ചുപോയ ഇരകളെ കിട്ടുന്നു

മനുഷ്യത്വം രക്തസാക്ഷികളെ,

അപ്പോഴും കൂടുതൽ അനീതികൾക്കായി വകയുന്നു

പല അനീതികൾക്കും എതിരെ

കൈ ഉയർത്തണമെന്നുണ്ട്

അറുത്ത് മാറ്റിയ തലകൾക്ക് താഴെ

മുറിച്ചു മാറ്റിയ കൈകളിൽ 

അത് മുങ്ങിപ്പോകുന്നു

എൻ്റെ മൃതദേഹം അധികം വരും പകൽ

എൻ്റെ മനുഷ്യത്വം 

സ്വപ്നം കണ്ടുതുടങ്ങുന്നു..