കിളി എന്ന നിയമനത്തിൻ്റെ ഉത്തരവ്

പറക്കുന്ന നിശ്ചലതയുടെ 

ആത്മീയതയുടെ

ലമ്പോറട്ടറിയാകുന്നു കിളികൾ

അവ ഓരോ നിമിഷവും 

പറന്നുകൊണ്ടിരിയ്ക്കുന്ന 

ആകാശം മുറിച്ചെടുത്ത് 

മരക്കൊമ്പിൽ ചെന്നിരുന്ന് 

വിശദമായി പരിശോധനയ്ക്ക്

വിധേയമാക്കുന്നു

ഏതെങ്കിലും ആകാശം 

പരിശോധനയിൽ വ്യാജമാണെന്ന് തെളിഞ്ഞാൽ

കാറ്റിനെ നിശ്ചലമാക്കി

നിറത്തിലെ നീല പിൻവലിച്ച്

മറ്റു കിളികളെ ചുറ്റും നിർത്തി

നിർബന്ധിച്ച് ആകാശത്തിനെ 

നിലത്തിറക്കുന്നു.

അറിയാതെ പോലും മറ്റൊരു കിളിയും 

ഇലയും പൂവും കാടും

ഉപയോഗിക്കാത്ത വിധം

തടാകത്തിലോ കടലിലോ

അല്ലെങ്കിൽ നിൻ്റെ കണ്ണിലോ 

എൻ്റെ ഉടലിൻ്റെ നിശ്ചലതയിലോ

ആരുടെയെങ്കിലും എഴുത്തിലോ

അനന്തമായി ആഴത്തിൽ കുഴിച്ചിടുന്നു.

ആഴത്തിൽ കിടന്നുകിടന്നു

അടുത്ത ജന്മം നിന്നെ 

കിളിയായി നിയമിയ്ക്കുന്ന കത്തിൽ

ആകാശം ഈ ജന്മം ഇടാൻ മറന്ന

ഒപ്പാവണം  ഞാൻ.