അമച്വർ വിഷാദങ്ങളെക്കുറിച്ച് തന്നെ

അഗ്നിയുടെ  ഒരായിരം മുത്തുകൾ

നൂലുപോലെ പ്രകാശം 

പൊട്ടിവീണപോലെ 

ഒരായിരം ചുംബനങ്ങൾ

ഉടലിൽ വീണ്

കടന്നുപോയി

സൂര്യനൊരു നൂല് 

സുഷിരങ്ങൾ പകലുകൾ

മെച്ചം വന്നത് പോലെ

കടന്നുപോകലുകൾ

അമ്പിളികല ചെലവ് 

അത് ഉയരേ വരും മാനം

മടുക്കുമ്പോൾ മനുഷ്യൻ

മണൽഘടികാരത്തിലെ 

മണൽ പോലെ ഉടലിൽ 

മടുപ്പിൻ്റെ ചൂടുള്ള അതിൻ്റെ ഉൾക്കൊള്ളലുകൾ

തണുക്കുവാനെന്നോണ്ണം

ഉടലിലിൽ മടുപ്പ്,

തിരിച്ചും മറിച്ചും വെക്കുന്നു

സമയമായും കലയായും

മടുപ്പ് ഉടലിൽ

അങ്ങോട്ടും ഇങ്ങോട്ടും മറിയുന്നു

കടലിനോട് ചേർന്ന് കിടക്കും 

മടുപ്പിൻ്റെ മഞ്ഞ്

മടുപ്പുകളുടെ പെൻഗ്വിൻ ജലം

കറുപ്പിലും വെളുപ്പിലും 

രണ്ട് മാസം തള്ളിനീക്കി

മടുത്ത മനുഷ്യൻ 

മഞ്ഞിൽ

കറുപ്പിലും വെളുപ്പിലും

അൻ്റാർട്ടിക്കയിലെ പെൻഗ്വിനാവുമ്പോലെ തന്നെ

ഒരു പക്ഷേ മഞ്ഞ് പോലെ

വിഷാദജലത്തെ 

തണുപ്പിക്കും കാലം

പെൻഗ്വിൻ വിഷാദങ്ങളെ

മഞ്ഞത്ത്, കടൽ 

കറുപ്പിലും വെളുപ്പിലും 

എടുത്ത് വെക്കും വിധം

എടുത്ത് വെപ്പുകളുടെ മഞ്ഞ നിറം

മടുപ്പിൽ 

ഉടലിൽ നിറയേ

മടുപ്പിൻ്റെ ഇൻക്വുമ്പേറ്ററിലെ

ആജീവനാന്ത ശിശുവെന്ന പോലെ

പറഞ്ഞുവരുമ്പോൾ

കാലത്തിൻ്റെ

നാലായിരം അമച്വർവിഷാദങ്ങളെ 

ഉടലിൻ്റെ അൻ്റാർട്ടിക്ക 

പെൻഗ്വിനുകളായി

എടുത്തുവെക്കും വിധം

മടുപ്പുകൾ വകഞ്ഞ്

വിഷാദങ്ങളെ മഞ്ഞ് കൊടുത്ത്

വളർത്തുന്നു

ഐസ്ക്യൂബുകളേ പ്പോലും

ആരാധിക്കുന്ന ജനതയായിരുന്നു

നിന്നിലെ ഐസ്ക്യൂബുകളെ

അകലെ നിന്ന്

ആരാധനയോടെ മാത്രം നോക്കി എന്നിലെ ലഹരി

ഐസ്ക്യൂബിൻ്റെ ചതുരങ്ങളെ 

ഒരു തിരക്കുമില്ലാതെ

വിസ്ക്കിവരകൾ 

അഴിച്ചെടുക്കും വിധം

ഓരോ ഐസ്ക്യൂബുകളിലേക്കും

ചാരിയിരിക്കും വിഷാദം

നിറയുകയും ഒഴിയുകയും ചെയ്യും

അസ്തമയഗ്ലാസുകൾ

പൊന്മാനുകൾ നീലയിലേക്ക് 

കലരും വിധം

ഐസ് ക്യൂബുകളുടെ ഭാഷ അത്

നിരന്തരം കൊത്തിതിന്നുന്നു

ഷാൻഡ്ലിയറിലെ അരണ്ടപ്രകാശബുദ്ധൻ

ഓരോ വിഷാദങ്ങളിലേക്കും 

സമയം നോക്കാതെ പൊട്ടിവീഴും

വിധം

പാട്ടിൻ്റെ സന്യാസിമഞ്ഞയെ

എല്ലാവിഷാദങ്ങൾക്ക് മുകളിലേക്കും അഴിച്ചുവിടും,

ഖവാലികളിലെ അജ്ഞാതബുദ്ധൻ

അസ്തമയചതുരങ്ങൾ 

ഉടച്ചുകളഞ്ഞ സൂര്യൻ

പതുങ്ങുന്ന,

കെട്ടിപ്പിടിക്കാവുന്ന 

ഒരു ടെഡിബീയർ പാവയാവുന്നിടത്ത്

വിഷാദങ്ങളെ 

മുറുകേ പിടിക്കുവാൻ

എൻ്റെ മഞ്ഞുകാലബുദ്ധനെ

അനുവദിക്കുന്നു...