ഇളംനീല നിറമുള്ള ഒരിടപെടൽ

ഉന്മാദികളുടെ ഓരോ പ്രവർത്തിയും

അത്രയും തീവ്രതയിൽ

പ്രാർത്ഥനകളാവുന്ന 

ഒരു സാധാരണദിവസമായിരിക്കണം

അത്

കാൽവിരൽക്കനലുകളുള്ള

ഉന്മാദികളുടെ ദൈവം

ഉണർന്നാലുടൻ

നാണത്തോടെ പരതും 

ഉന്മാദികളുടെ പ്രാർത്ഥന

ഉന്മാദിയായ ആകാശം

പറക്കുന്ന പക്ഷികളേ വെച്ച്

ഏറ്റവും ഒടുവിലെ നാണം 

ഘട്ടം ഘട്ടമായി മറയ്ക്കുന്നിടത്ത്,

പക്ഷികൾ മറയ്ക്കുവാൻ ശ്രമിക്കുകയായിരുന്നിരിക്കണം

ദൈവീകമായ നാണത്തിൻ്റെ ആഴം

എത്ര വൈകിയാലും

ഒരിക്കലും അവസാനിക്കാത്ത

വിഷാദികൾകളുടെ വൈകുന്നേരങ്ങൾ

വിഷാദികൾക്ക് 

ഏതുനേരവും

വൈകുന്നേരങ്ങൾ

അഥവാ വൈകുന്നേരം 

മാത്രമുള്ള വിഷാദികൾ

എടുത്ത് വെക്കും മുമ്പ് 

തീർന്നുപോകും അവരുടെ

പകലുകൾ

മൂന്ന് നേരവും 

അസ്തമയം മാത്രമുള്ള അവരുടെ ദിനസരികൾ

സായാഹ്നങ്ങൾ 

സായാഹ്നങ്ങൾ

സായാഹ്നങ്ങൾ

അത് കഴിഞ്ഞ് വരും ഇരുട്ട് എന്ന യാഥാർത്ഥ്യം

ദൈവമാകുവാൻ തുടങ്ങുന്നു

ക്ഷമിക്കണം

ഉന്മാദികളുടെ ദൈവം എന്നല്ല

ഉന്മാദിയായ ദൈവം എന്ന് തന്നെ വായിക്കണം

അതും അകക്കണ്ണുകൊണ്ട്

അതേ

അതേ ദൈവം

ഏകാന്തതയുടെ 

സൈഡ് വ്യൂ മിറർ മാത്രം നോക്കി

വിഷാദികളേ ഓവർടേക്ക് ചെയ്യും

അതേ ദൈവത്തിൻ്റെ

സായാഹ്നവളവുകൾ

വിഷാദികളും കൊടുംവളവുകളും 

എന്ന് മാത്രം

ദൈവത്തിന് മുന്നിൽ

കണ്ണാടിയുടെ രസത്തിൽ

അതിൻ്റെ 

ശാന്തമായ പ്രതിഫലനങ്ങൾ

അതും

പലപ്പോഴും

ദൈവത്തിൻ്റെ ഏതെങ്കിലും ഒരു അലസനോട്ടത്തിന്

തൊട്ടുമുന്നിൽ

അല്ലെങ്കിൽ എല്ലാം കഴിഞ്ഞ് തൊട്ടുപിന്നിൽ

അമ്പിളിക്കല

പിന്നിലേക്ക് പിന്നിയിട്ട രാവുകളിൽ

ഒന്നിൽ

ഹെഡ്ലൈറ്റുകളുടെ തീവ്ര പ്രകാശത്തിന്

പിന്നിൽ അതേ ദൈവം

ദൈവത്തിൻ്റെ

അതേ ദിനചര്യകൾ

ചരിവുകളും അവയുടെ സൂക്ഷമതകളും

കടുംപിടിത്തങ്ങളും

വേഗതകളുടെ കൊടുംബൈക്കുകളും 

ഉള്ള അതേ ഉന്മാദിയായ ദൈവം 

ഇരുചക്രവാഹനങ്ങളുടെ

ദൈവം എന്ന് അപ്പോഴും അരികിൽ

കൈവിട്ട വിഷാദം

ഒരിക്കലും 

വിഷാദം ഒരു ഇന്ധനമല്ല

എന്നാലും ലിറ്റർ കണക്കിന് വിഷാദം

ഇന്ധനമായി ഉൾക്കൊള്ളും

ഫ്യൂൽ ടാങ്കിന് ഇരുവശത്തേക്കും

കാലുകളിട്ട്

അഡ്രീനാലിൻ്റെ ആക്സിലറേറ്ററുകൾക്ക്

തീ കൊടുത്ത്

പല ബൈക്കുകളിലായി ദൈവം

തുടകൾ മുറുക്കുന്നു

കൈകൾ അയക്കുന്നു

കൈകൾ കൊടുക്കും എടുക്കും വിധം

ദൈവം മുറുകേ പിടിക്കും

അതിവേഗങ്ങൾ 

സഡൻബ്രേക്കുകളിലേക്ക്

കൊറ്റികൾക്കൊപ്പം പറന്നിറങ്ങും

ദൈവത്തിൻ്റെ കാലുകൾ

വിഷാദികൾ

അപ്പോഴും ദൈവനടത്തങ്ങൾ എടുത്തുവെക്കുന്നു

സ്വന്തം കാലിൽ

നടക്കുന്നു

വിഷാദികളുടെ സ്പീഡോമീറ്ററിൽ

ഇനിയും തെളിയാത്ത

സെറോടോണിൻ, നോർഎപൈനെഫ്രൈൻ, ഡോപാമൈൻ

തുടങ്ങിയ

ന്യൂറോട്രാൻസ്മിറ്ററുകളുടെ സൂചികൾ

ഓ എന്ന് നീട്ടി അവഗണിക്കാമെങ്കിൽ

കൂടുതൽ ഒന്നുമില്ല

ഉടലിൻ്റെ കെടുകാര്യസ്ഥകളോട്

ഭാഷയുടെ ഒരു ഇളംനീലനിറമുള്ള

ഇടപെടൽ

അത്രമാത്രം