നർത്തകി നിൻ്റെ നൃത്തമാതൃത്വം

നൃത്തത്തിൻ്റെ കൈക്കുഞ്ഞുള്ള സ്ത്രീ

നിൻ്റെ നൃത്തമാതൃത്വം 

താരാട്ട് നീയുടുക്കും പട്ടുസാരി

നിൻ്റെ പാട്ടിന് താരാട്ടിൻ്റെ ഇഴ

നീ കാതെഴുതി കൊടുക്കുന്നതെല്ലാം

പാട്ടാവുന്നു

കണ്ണെഴുതുന്നിടത്ത് നിന്ന് 

ഉടൽ തുടങ്ങുന്നു

ക്ലാസിക്കൽ നർത്തകി

നിൻ്റെ നൃത്ത ഉത്ക്കണ്ഠ 

ഏത് ചുവടിൽ 

ഏത് മുദ്രയിൽ നീ ഇറക്കിവെക്കുമെന്ന് 

ജനാലകൾ ഉടുത്ത് ഞാൻ ആശങ്കപ്പെടുന്നു

എനിക്ക് മുന്നിൽ പറന്നുകാണിക്കും

ദൈവം

വെറും കിളിയാണെന്ന്

ബോധ്യപ്പെടുത്തുവാനുള്ള നിൻ്റെ ശ്രമങ്ങൾ എന്നെ കൂടുതൽ മനുഷ്യനാക്കുന്നു

നർത്തകീ നിൻ്റെ നൃത്തം

അസ്തമയം ഒരു താളമാണെങ്കിൽ

സൂര്യൻ ഒരു രാഗം

നിൻ്റെ നൃത്തം അസ്തമയത്തിൽ

തട്ടുമോ

നിൻ്റെ മൂക്കൂത്തിയാകുമോ

എൻ്റെ വിഷാദം എന്ന് 

നമ്മുടേതല്ലാത്ത വൈകുന്നേരങ്ങൾ

വെറുതേ സംശയിക്കുന്നു

നീ വൈകുന്നേരങ്ങളെ ആശംസാ കാർഡിലെ ചിത്രങ്ങളാക്കുന്നു

അസ്തമയം കൊണ്ട് പകൽ പൊതിഞ്ഞെടുക്കുന്നു

സൂര്യനെ പൊതിയും അസ്തമയം

നീ നൃത്തം വെച്ച് അപ്പോഴും അഴിച്ചെടുക്കുന്നു

ദൈവം മതത്തിൻ്റെ കൂടുള്ള കിളി

എന്ന് നിൻ്റെ ഓരോ നൃത്തവും

മനുഷ്യനിലേക്ക് മാത്രം തുളുമ്പുന്നു

മാതൃത്വവും കൈക്കുഞ്ഞിലേക്ക്

പാൽമണമോടെ തിരിയുന്നു

നിന്നിലെ എരിയും നൃത്ത നാളങ്ങൾ

എന്ന് ഞാൻ

നർത്തകിയാകുവാൻ പോയ

നിൻ്റെ ഉടൽ വൈകിയും 

നീയും ഞാനും കാത്തിരിക്കുന്നു

നൃത്തമില്ലാത്തവൾ എന്ന നിൻ്റെ കാത്തിരിപ്പിൻ്റെ കുത്ത് വാക്ക് നീ

അപ്പോഴും കേട്ടില്ലെന്ന് നടിക്കുന്നു

ഒരു പക്ഷേ നൃത്തംവെക്കുമ്പോഴും

ഉറക്കത്തിൻ്റെ കുട്ടിക്യൂറ ടിന്നിൽ

നീ മണമുള്ള ഉറക്കം ഇട്ടുവെക്കുന്നു

നീ ഉണർന്നിരിക്കുന്നു

അപ്പോൾ നീ വെച്ച നൃത്തമെല്ലാം

എവിടെ എന്ന് എൻ്റെ സൂര്യൻ മാത്രം എത്തിനോക്കുന്നു

നിൻ്റെ നൃത്തം ആരും കാണാതെ എൻ്റെ സൂര്യൻ്റെ കണ്ണുപൊത്തുന്നു

ഇരുട്ടിന് നീ ആരും കേൾക്കാത്ത താരാട്ടാകുന്നു

നീയില്ലാത്തത് കൊണ്ട് എന്ന വാക്കിൻ്റെ കൊലുസ്സണിഞ്ഞ്, എൻ്റെ പകൽ എന്നും പൂർത്തിയാകാത്ത ഒന്നാകുന്നു.