പനി ചിതൽ എന്ന് ചിത്രങ്ങൾ

എൻജിൻ സ്റ്റാർട്ട്ചെയ്ത്

നിർത്തിയിട്ടിരിക്കുന്ന 

വണ്ടിയുടെ ഇരമ്പം,

ഉടലിൽ

ഒന്ന് നിർത്തി, പനിയ്ക്ക് 

മഞ്ഞനിറം കൊടുക്കുകയായിരുന്നു

ഉടലിന്റെ റോഡ്റോളറായി പണിയെടുക്കുകയായിരുന്നിരിക്കണം

പനി 

കാലിലെ അക്വേറിയത്തിൽ

മീനുകളായി 

നീന്തുവാൻ വരും 

അവളുടെ വിരലുകൾ

അവയ്ക്ക് പനിയില്ല 

ചൂടുമാത്രം

തള്ളവിരലിലെ അക്വേറിയത്തിൽ

വിരലുകൾ വെള്ളാരംങ്കല്ലുകൾ

അരികിൽ കല്ലുകളായി കൂട്ടിവെയ്ക്കും

മറ്റുവിരലുകൾ

അരികിൽ

ജാലകങ്ങളുടെ ശേഖരമുള്ള ദൈവം

എത്തിനോട്ടങ്ങളുടെ വള്ളിച്ചെടി

കൈയ്യെത്തി

മീനിന്റെ കണ്ണുകളിൽ

ദൈവത്തിന്റെ എത്തിനോട്ടം ഇട്ടുവെയ്ക്കുന്നു

ഞാനത് തട്ടിപ്പറിക്കുമോ എന്ന് മീനുകൾ

അപ്പോഴും ഭയപ്പെടുന്നു

പനി തട്ടിപ്പറിച്ചോടും കുട്ടിയാവും ദൈവം

മീനുകളുടെ കണ്ണിലെ ഭയം 

ദൈവം തിരുത്തുന്നു

എത്തിനോട്ടം നിലനിർത്തുന്നു

ദൈവത്തിന്റെ കണ്ണിലെ എത്തിനോട്ടങ്ങളുടെ സ്റ്റെതസ്ക്കോപ്പ്

എന്റെ ഹൃദയം,

മീനുകൾക്ക് താഴെ 

അവയുടെ പരിശോധനകൾക്ക്

വിധേയം

പരിശോധിക്കുന്തോറും

അവയുടെ നീന്തലുകൾ ഇട്ടുവെയ്ക്കും കുപ്പിയായും ഹൃദയം

എന്നിൽ മീനുകളുടെ നീന്തലുകളുടെ

ശേഖരം

കവിത തിന്നുന്ന ചിതലാണ് മനുഷ്യൻ

അത് ചുവരിലെ ചിത്രത്തിലെ

ദൈവത്തിന്റെ ആത്മഗതമാവുന്നു

അക്വേറിയത്തിലെ കുമിളകൾക്ക്

ജലം മാറ്റിയിട്ടു കൊടുക്കുകയാണ്

എന്റെ ശ്വാസം

ജലം തൊടാതെ

എനിയ്ക്ക് ചിതലിന് 

നിറം കൊടുക്കുവാൻ തോന്നുന്നു

നീലച്ചിതൽ

ആത്മഗതത്തിന്റെ ചിതലെടുക്കുന്ന

ദൈവത്തിന്റെ പ്രതിഷ്ഠ

അവളുടെ പിങ്ക് അസ്ഥി

മീനുകൾക്കരികിൽ ചരിഞ്ഞുകിടക്കും

ദൈവം

സ്വർണ്ണനിറമുള്ള ചിതൽ

സ്വർണ്ണനിറത്തിൽ നിന്നുണർത്താതെ

തോളത്തിട്ട് തട്ടി ഉറക്കി

മൂക്കുത്തിയിലെ ചിതലിന് 

മുത്തം കൊടുത്ത് മാറ്റിക്കിടത്തുന്നു

ഉടലിന്നരികിൽ

ജിമിക്കിക്ക് ചിതലെടുക്കുവാൻ

പരിശീലനം കൊടുത്തുതുടങ്ങുന്നു.