കറുക്കുന്ന കാതുള്ളവൾ പാട്ടും

പഴയപാട്ടുകൾ കൊണ്ട്

കാതുകഴുകുന്ന ഒരുവൾ

അവളുടെ കറുക്കുന്ന കാതിന്നരികിൽ ചുണ്ടുകൾ മാത്രം ചുവന്നിരിയ്ക്കുന്നു

ഞാൻ അവളുടെ

കറുക്കുന്നപാട്ടുകൾ ഇട്ടുവെയ്ക്കും പെട്ടി

അവളുടെ ചുണ്ടുകൾ,

മൂളിപ്പാട്ട് മാറിയുടുക്കുവാൻ വരും ഇടം

അവൾ കറുക്കുന്ന കാതുകളുടെ,

കറുത്തുതീരാത്ത ഉടലിന്റെ ശേഖരമുള്ളവൾ

അവൾക്ക് ബ്ലാക്ക് & വൈറ്റിന്റെ മൂക്കുത്തി

അതിൽ പാട്ടിന്റെ മൂക്കൂത്തിക്കല്ല്

അവൾ പാട്ടുകൾ കോരി പുറത്തേയ്ക്കൊഴിക്കുന്നു

അവളുടെ ഗ്രാമ്പൂമണമുള്ള മറുക്

വാക്കുകൾ കറുപ്പിയ്ക്കുന്നു

നേരം മാത്രം വെളുപ്പിയ്ക്കുന്നു

മറുകിന്റെ ചെമ്പരത്തീനിഴൽ

സഞ്ചരിച്ച് സഞ്ചരിച്ച്

നീങ്ങിനീങ്ങി

പാട്ടിൽ ചെന്ന് തട്ടി

ഉടൽ കറുക്കുന്നു

മിന്നാംമിന്നിയ്ക്കും അവൾക്കും

ഒരേ രാത്രി

ഒരേ റവുക്ക

രണ്ട് വ്യത്യസ്ത ഹൂക്കുള്ള ഇരുട്ടുകൾ.