പ്രണയത്തിലേക്ക് കയറിനിൽക്കും രണ്ട് അപരിചിതർ

അപരിചിതത്ത്വം നിലനിർത്തി

പരിചയപ്പെടുകയായിരുന്നു 

അവൾ അപരിചിത എന്നോരു ചിരി ചിരിച്ചു

ഒന്നും മിണ്ടാത്ത ചുണ്ടുകൊണ്ട്

ഞാനതേറ്റുവാങ്ങി

കഴിഞ്ഞ ജന്മത്തെ 

പൊന്മാനായിരുന്നു ഞാൻ

അത്, 

അതിൻ്റെ ജലത്തെ കണ്ടെത്തി

ആഴത്തിനും ഉയരത്തിനും 

ഇടയിൽ നീലനിറത്തിൽ

ഞാൻ തുടർന്നു

അവൾ മൈന 

തവിട്ടുനിറത്തെ എനിക്ക് പരിചയപ്പെടുത്തുവാൻ മറന്നവൾ

എന്ന് പറന്നു

മഞ്ഞ അപ്പോഴും എന്നിൽ 

നിന്നും അവൾ മറച്ചു

എൻ്റെ നാഭി നീല

പൂത്തിട്ട് പന്ത്രണ്ട് വർഷമായെന്ന

കുറിഞ്ഞി എൻ്റെ ഓർമ്മ

കുറിഞ്ഞികൾ പൂക്കുന്ന 

പന്ത്രണ്ട് വർഷങ്ങൾ എന്നിൽ ബാക്കി വെച്ചു ഉടൽ അപ്പോഴും നീലനിറത്തിൽ

അവൾ എൻ്റെ നാഭിയിൽ 

ആഴം കലർത്തി പൂക്കൾ കൊത്തുന്നു

ഞാൻ വിരിഞ്ഞ് തുടങ്ങുന്നു

അരികിലെ തടാകത്തിൽ

ഞാൻ കലരും ഓളങ്ങൾ

അവൾ അവളിൽ ഞാൻ വിരിയും ഋതു

അതിൻ്റെ അപരിചിതത്ത്വങ്ങളിൽ നിന്നും

ഇറുത്തെടുത്ത പനിനീരുപോലെ പ്രണയം

ഞങ്ങൾക്കിടയിൽ നിന്നു

ഒരു പക്ഷേ ഒരൽപ്പം അകന്നു മാറി

അകലങ്ങളുടെ ഇതളുകളുള്ള

പനിനീരുകൾ 

നമ്മുടെ ഭാവികാലങ്ങളിൽ

വന്നു വിടരുന്നു

അലക്ഷ്യമായി സൂക്ഷിക്കാവുന്ന പ്രണയങ്ങളും ഉണ്ട് അവൾ തുടർന്നു

ഒന്നിലും തുടരാത്ത ഒരുവളും 

അവിളിൽ ഒളിച്ചു പാർക്കും വിധം 

അവൾ എന്നെ നോക്കി

നോട്ടങ്ങൾക്ക് തുടർച്ചകൾ

അവയ്ക്ക് കാത്തിരിക്കുന്നവരുടെ ചിത്രങ്ങൾ

ചിരാതുകൾ കൊളുത്തി

കുറുകുന്ന പ്രാവുകൾ

അരികിൽ വെച്ചു അവൾ

അപരിചിതയുടെ ഹൃദയ മിടിപ്പ് സൂക്ഷിക്കുന്ന ഒരുവൾ എന്ന് 

അവളുടെ ഹൃദയം എന്നിൽ വന്ന് കുറുകി

എൻ്റെ ഹൃദയം

പനിനീർപ്പൂക്കൾ സന്ദർശകരായ

പ്രണയ മ്യൂസിയത്തിലെ ശിൽപ്പം

എന്നായി അവൾ

അപരിചിതത്ത്വത്തിൻ്റെ ശിൽപ്പമെന്നോണ്ണം

പ്രണയ മ്യൂസിയങ്ങളുടെ സന്ദർശകർ

എന്ന വിധം അപരിചതരായിരുന്നു

നമ്മൾ 

തുടർന്നുവോ ഞാൻ

മന്ത്രിച്ചുവോ അവൾ

അപരിചിതത്ത്വങ്ങളുടെ കട്ടെടുപ്പ്

വീണ്ടെടെടുപ്പുകൾ ഇട്ടുവെക്കുവാനും

വേണ്ടേ ഒരിടം?

പകൽ, വെളുപ്പാൻകാലങ്ങൾ ഒളിപ്പിക്കുന്നു

അപ്പോൾ രാത്രിയോ

രാത്രി നമ്മളെ എന്നവാം എന്നവൾ

അറിയില്ല എന്ന വാക്കിൻ്റെ

വീണുടയൽ തന്നെയല്ലേ പ്രണയം

പലവട്ടം ഉടഞ്ഞ ഉടൽ

ഒരിക്കൽ കൂടി ഉടയാനുള്ള

വിട്ടുകൊടുപ്പ് 

അപരിചിതത്ത്വം

പ്രണയിക്കുമ്പോൾ മനസ്സ് വെക്കുന്ന ഒരിടം എന്നാവാം അവൾ

നിശ്ശബദ്ത ഇറക്കിവെച്ച കല്ലുപോലെ

ചാരനിറമുള്ള കാലം

മോഷ്ടിക്കുന്നവർക്ക് എപ്പോഴും ധൃതിയാണ് എന്നവൾ

ഞാൻ പ്രണയം മോഷ്ടിച്ചുവോ

എന്ന് സംശയിക്കുവാനൊരുങ്ങും ഞാൻ

പ്രണയത്തിൻ്റെ മോഷണമുതൽ പോലെ

അവൾ

ശരിക്കും സമയം മോഷ്ടിക്കുന്നത്

പോലെ ഞാൻ അവളെ മോഷ്ടിക്കുന്നു.