മരം ഒരുറക്കംതൂങ്ങലിനെ വേരാക്കും വിധം

വീഴുന്നതിന് മുമ്പ് ഒരിലയുടെ പാളിനോട്ടം

ഉറങ്ങുന്നതിന് മുമ്പ് ഒരു താരാട്ടിലേക്ക്

അതും കേൾക്കുന്നതിന് മുമ്പിലേക്ക്

കേൾക്കുന്നതിൻ്റെ തൂവൽ പോലെ

താരാട്ടിന് മുന്നിലേക്ക് വന്ന് വീഴും ഉറക്കത്തിൻ്റെ ഒരില

ഒരു പാളിനോട്ടമുണ്ട്

ഉറക്കത്തിനും,

കേട്ട താരാട്ടിലേക്കും

കുഞ്ഞിലേക്കും

അതും ഉറങ്ങിയതിന് ശേഷവും 

ഉറങ്ങുന്നതിന് മുമ്പും

ഒരു പക്ഷേ ഒരമ്മയോളം

മുകളിൽ

വെള്ളമൊഴിച്ച് ചന്ദ്രൻ മാറ്റിവെക്കും

കലകളുടെ താരാട്ട്

അതും ഇരുട്ടുന്നതിനും തൊട്ട് മുമ്പ്

ഉറക്കം കൺപോളകളിൽ കുറിച്ചുവെച്ച്

താരാട്ടിൽ ഒഴുകിപ്പോകും രണ്ടിലകൾ

കുഞ്ഞിൻ്റെ കാലടികൾ

ഉറക്കുന്നത് ഒരമ്മയാണെങ്കിലോ

എന്നും ഉറക്കിക്കൊണ്ടിരുന്ന

കുഞ്ഞ് അരികിലില്ലങ്കിലോ

ഞെട്ടുകൾ അഴിച്ചിട്ട്

തുമ്പുകൾ വാരിക്കെട്ടിവെച്ച്

ചില്ലകൾ കഴുകിക്കമഴ്ത്തിയ

മരങ്ങൾക്ക് ചോട്ടിലേക്ക്

ചേക്കേറും ഇലകൾ

തൂവലുകൾ എല്ലാം ഉറക്കി

ഒരു കിളിയുടെ ഉറക്കംതൂങ്ങലുകൾ

ഏറ്റുവാങ്ങും മരം

ഉറക്കം കിനിയും മുലഞ്ഞെട്ട്

പാലൊച്ച കേൾപ്പിക്കാതെ

മുലഞ്ഞെട്ടിൻ്റെ വാൽസല്യത്തിലേക്ക് അതിൻ്റെ മടങ്ങിപ്പോക്ക്

അപ്പോഴും അമ്മമണങ്ങളിൽ

കൺപോളയോളം തങ്ങിനിൽക്കും 

ഒരു കുഞ്ഞ്താരാട്ട്

അതിൻ്റെ നക്ഷത്രത്തിൽ

കണ്ണടച്ച് കിടക്കും ഡിസംബർ,

ആകാശത്തിൽ.

അതിനരികിൽ

ഒരു ജനുവരികോശത്തിൻ്റെ ഉറക്കംതൂങ്ങൽ

വേര് മണ്ണിനെ ഉറക്കുന്നു

ഇനിയും ഉറങ്ങാത്ത ആകാശത്തിൽ

പതിയേ ഒരില തൊടുന്നു.