കള്ളൻ ആൾക്കൂട്ടം എന്നിവയിലെ ഒന്നെന്ന നിർമ്മിതി

ഒരാൾ കൂടി 

വരുവാനുള്ള ഒരാൾക്കൂട്ടം.

ഒരാൾക്കൂട്ടത്തെ 

മോഷ്ടിച്ചുകൊണ്ടു പോകുന്ന 

കള്ളൻ

എല്ലാ ആൾക്കൂട്ടങ്ങളും

പലപ്പോഴായി

കള്ളനായി മാറ്റിനിർത്തി 

അവരിൽ ഒരാളെ

അയാളുടെ നിറം

അയാളുടെ സ്വഭാവം

അയാളുടെ സമയം

അതിനനുസരിച്ചു രൂപപ്പെട്ടുവരുന്നു

പകൽ ആൾക്കൂട്ടങ്ങളെ 

ഒഴിച്ചുവെയ്ക്കുന്ന

കുപ്പിയായി കാണപ്പെട്ടു

കൂടെ ഒഴിക്കപ്പെട്ടു 

അയാൾക്ക് ചുറ്റും നിൽക്കുന്നവർ

ഒപ്പം രാത്രിഗന്ധിയായ

പൊള്ളുന്ന വെയിലും

നിറം കൊണ്ടുകൊണ്ടു കറുത്തുപോയത്

നിറമുള്ളതും നിറമില്ലാത്തതുമായ

കുപ്പികളുണ്ടായി

ആൾക്കൂട്ടം, ഒരാളെ തുറക്കുന്ന താക്കോലാണെന്ന്

ആരോ പറഞ്ഞു

എന്നിട്ടും അയാൾ മാത്രം തുറന്നുകിടന്നു.

അകത്തേക്ക് മാത്രം ചാരി

അവിടെ തുടർന്നു

ഓടിട്ട വീടുകളിൽ

പിറകുവശത്ത് മാത്രം

ചാരി,

ചരിച്ച് വെച്ചിരിക്കുന്ന വിധം 

കാണപ്പെടുന്ന എണികൾ

വാരിയിൽ നിന്നും 

താഴെ വീഴുന്ന വെള്ളം

താഴെവീണ്

താഴെവീണ് 

അവിടെ കിടന്ന്

കെട്ടിക്കിടക്കുന്നതിന് മുമ്പ്

ഒലിച്ചുപോകുന്നതിന് മുമ്പ്

താഴെ നിന്ന്

എണിയെടുത്ത് ചാരി 

മുകളിലേയ്ക്ക് കയറി

ചോർച്ചകൾ അടച്ചു

ഓടുകൾ മാറ്റിയിട്ടു

തനിയെ മഴ നനഞ്ഞ്

താഴെയ്ക്കിറങ്ങി

പനിയ്ക്കപ്പെട്ടവരും

പനിപിടിക്കാത്തവരും ഉണ്ടായി ആൾക്കൂട്ടങ്ങളിൽ

അവർ തങ്ങളിൽ ഇടപഴകി

പനിക്കോളുകൾ പങ്കുവെച്ചു

വിരൽ കമഴ്ത്തി 

പരസ്പരം അളന്നു

നെറ്റിയിൽ പനിച്ചൂടുകൾ

ഇല്ലാതായി

ഓടിട്ടവീടുകൾ വാരികൾ

ചാരിവെയ്ക്കുവാൻ 

ഇല്ലാതായി ഏണികൾ

അദൃശ്യവാരിയിൽ നിന്നും

വെള്ളം മാത്രം ഇറ്റി താഴെ വീണു

കെട്ടിക്കിടന്നു

ഒഴുകിപ്പോയി.

ആൾക്കൂട്ടങ്ങൾ കയറിയിറങ്ങി

വീടുകളിൽ

ഉള്ളതും ഇല്ലാത്തതുമായ

വീടുകളുണ്ടായി

വീടുളളവരെന്നും

വീടില്ലാത്തവരെന്നും 

ആൾക്കൂട്ടം രണ്ടായി

സാവകാശത്തിലും

വേഗത്തിലും

ബംബിൽ 

വാഹനങ്ങൾ കയറിയിറങ്ങുന്ന

പ്രതീതി ചുറ്റുമുണ്ടായി

കള്ളൻ കയറാതെ

തുറന്നുകിടന്നു വീടുകൾ

ഇല്ലാതായ വീടുകളുടെ അകവശം

മാത്രം 

മഴയില്ലാത്തപ്പോഴും ചോർന്നു

അവിടുന്നൊരാൾ ഇറങ്ങിവന്നു

ചുറ്റും ആൾക്കൂട്ടത്തെ ഉണ്ടാക്കുന്നു

കാലിൽ ചിലങ്കയിട്ട്

നൃത്തം വെയ്ക്കുന്നത് പോലെ

കള്ളനാവുന്നു.