പഞ്ഞിക്കായകൾ ശ്മശാനങ്ങൾ

കാതുകളുടെ കാട്

മുഖങ്ങളെല്ലാം മൃഗങ്ങൾ

നഗ്നത,

മനുഷ്യരെ മാത്രം ആക്രമിക്കുന്നു

തുറന്നയിടങ്ങൾ നഷ്ടപ്പെടും മനുഷ്യർ എന്ന ലേഖനത്തിൽ

അപകർഷതാ ബോധത്തിനും പിന്നിൽ 

മൃഗങ്ങളെ പിന്തുടരുകയായിരുന്നു

ലജ്ജ പെറ്റുകിടക്കും

ഉടലിന്റെ മടയിൽ

പിന്തുടരുന്നതിന്റെ സടവെച്ച് കളിക്കും

നഗ്നതയുടെ കുഞ്ഞുങ്ങൾ 

പൂക്കളും നഗ്നതയും

അവയുടെ 

ആറുമണി ശ്മശാനങ്ങളും

നഗ്നതയുടെ 

കൊത്തുപണികളുള്ള ശിൽപ്പശാല 

പതിയേ ശ്മശാനമാകുന്നു

പൂക്കളുടെ വർഗ്ഗീയത സംസാരവിഷയമാവുന്നു

പങ്കെടുക്കുന്നവരെല്ലാം

പൂക്കളുടെ നഗ്നതക്കരികിലിരിക്കുന്നു

പൊടുന്നനെ നഗ്നതയില്ലാത്ത ഒരാൾ

കടന്നുവരവുകളുടെ അതിഥി

ഓരോരുത്തരും 

അവരവരുടെ

ശ്മശാനത്തിന്റെ അരികിലിരിക്കുന്നു

ഒരൊറ്റ ആശ്ചര്യചിഹ്നത്തെ മാത്രം

ഓരോരുത്തരും

താഴേക്കിറക്കുന്നു

ഓരോരുത്തരും അവരവരുടെ ആശ്ചര്യചിഹ്നത്തിന്റെ

അതിഥി

ഒരാശ്ചര്യചിഹ്നത്തേ മാത്രം ഉൾക്കൊള്ളും വിധം

അതിശയം മാത്രമാവും മനുഷ്യൻ

കടന്നുവരവിൽ നീല പുരട്ടി

ആകാശം ഇന്നൊരിത്തിരി സാവകാശം

ഒരു പൂർണ്ണവിരാമത്തെ കണ്ട്

മൃഗത്തെപ്പോലെ മുരളും

ആരുടേതുമല്ലാത്ത ഒരാശ്ചര്യചിഹ്നം

അതിഥികൾക്ക് സമാന്തരമായി

രൂപപ്പെടുന്നതെന്തും

പൂവാകുന്നതിൽ നിന്നും നഗ്നതയെ

ശലഭങ്ങൾ മാത്രം തടയുന്നു

അടക്കുവാനാകാതെ നഗ്നത മാത്രം

ബാക്കിയാവും വിധം

ശ്മശാനങ്ങൾ മാഞ്ഞുപോകുന്നു

മജ്ജകളുടെ ലൈബ്രറിയിൽ

എല്ലുകൾ എടുക്കുന്നതെന്തും

ഉടലുകൾ വായന എന്നിവയുടെ അടുക്ക്

ലജ്ജകളുടെ ബുദ്ധൻ

ശംഖുപുഷ്പഭാഷയുടെ ഉടമ

ഉന്മാദശിൽപ്പങ്ങൾ മറിച്ചുനോക്കിയിരിക്കും

ആകാശത്തിന്റെ അർദ്ധനഗ്നത

നിന്നെയൊന്നു മറിച്ചുനോക്കുന്നുണ്ട്

നീന്തലിന്റെ പുസ്തകം എടുക്കുവാൻ

വരും മീനുകൾ

ദീർഘദൂരയാത്രയുടെ നിശ്വാസമുള്ള

എന്റെ കാതിന്റെ മീൻ നീന്തിച്ചെല്ലും

ശംഖ്പുഷ്പബുദ്ധനോട്

ജാലകങ്ങളിൽ നിന്നും 

നോവ് എത്തിനോക്കും അഴിയുള്ള

കടി കൊടുത്തുവിടുന്നു

ഇനിയും ഒരു ഉടലും നഗ്നതയുമറിയാത്തത്

വെള്ളാരങ്കല്ലിന്റെ ധ്യാനമുള്ള

വിരൽത്തുമ്പിലെ ശംഖുപുഷ്പബുദ്ധൻ

ആവർത്തിക്കുന്നു

ശംഖുപുഷ്പഭാഷകളുടെ ഉടമ

ഐസ്പോലെ അലിയും 

ജാലകം തുറക്കുന്നു

അലിയും മുമ്പ് അഴികളിൽ

മുറുകേ പിടിക്കുന്നു

ഓരോ വിരലുകളും അതിശയത്തിന്റെ

ലായനികൾ

ഓരോ വിരലുകൾക്കും

ഓരോ ശ്മശാനങ്ങൾ,

അതും മാഞ്ഞുപോയത്

വിരലുകൾ അത് മാത്രം തിരയുന്നു

മഞ്ഞിന്റെ ആത്മാക്കളെപ്പറ്റി

അപ്പൂപ്പന്താടിയോട്

 പ്രണയത്തിലാവുന്നതിനേപ്പറ്റി

പഞ്ഞിക്കായോട്

ചന്ദ്രന്റെ അതിഥി എന്ന നിലയിൽ

ചന്ദ്രക്കലയിൽ പങ്കെടുക്കുന്നു

മടങ്ങുന്നു

മിനുങ്ങുന്നതിന്റെ തൊട്ടിലിൽ

മിന്നാംമിനുങ്ങുകൾ മയങ്ങുവാൻ

കിടക്കുന്ന നേരത്ത്

പഞ്ഞി മരത്തിന്റെ ഇല,

ചന്ദ്രനാവുന്നതിന്റെ സാധ്യതകളേപ്പറ്റി

തുണികൊണ്ടുള്ള നിലാവ്

രാത്രി ആലോചിക്കുന്ന ശബ്ദത്തിൽ

മഞ്ഞിന്റെ മടക്കത്തിൽ

ചന്ദ്രനും പങ്കെടുക്കുന്നു

പലായന ചന്ദ്രൻ

എന്ന പേരിൽ മഞ്ഞ് തടയുന്നു

പലായനങ്ങളുടെ മാറുള്ള

അമ്മയുടെ മടിയിൽ 

കുഞ്ഞെന്ന പോലെ ചന്ദ്രൻ

ശലഭങ്ങളുടെ,

അപകർഷതാബോധത്തിൽ തൊടുന്നു

എന്റെ അപകർഷതാബോധത്തിനാണ്

കൂടുതൽ ഭംഗി എന്ന് വിചാരിക്കുന്നു.