അന്നും

 

ഒരു ചിറകടി പക്ഷി പൂർത്തിയാക്കിയിട്ടില്ല

വൈകി നീലനിറമാർന്ന ആകാശം

ഇനി വൈകുന്നത് നീലനിറമാണെങ്കിലോ

പറക്കുന്നത് ഓർത്തെടുക്കുവാൻ

ശ്രമിക്കുന്ന പക്ഷിയേപ്പോലെ

ഓർത്തെടുക്കലിൽ അന്നും ആകാശവും

പങ്കെടുക്കുന്നു

തൂവലുകളുടെ സ്‌മരണിക

അന്നും അവയുടെ പ്രകാശനങ്ങൾ

ഓർത്തെടുക്കുവാൻ വൈകുന്ന 

ഒരു വാക്കായി

മേഘനിഘണ്ടുവിൽ വിരലിനൊപ്പം

ആകാശവും നീങ്ങുന്നു

പക്ഷിനിഘണ്ടുവിൽ

അന്നും കൂടുതൽ ചിറകടികൾ

നീക്കങ്ങളുടെ

അളവുതൂക്ക വകുപ്പ്

മേഘങ്ങളുടെ ഉദ്യോഗസ്ഥൻ

പരിശോധനക്ക് പകരം,

അന്നും കുറിച്ച്കൊടുക്കുന്നത് 

ഒരു വാക്കാണെങ്കിൽ

അതിൻ്റെ ഭാരമില്ലായ്മ

അതിട്ട് വെക്കുവാൻ 

നോക്ക് തിരയും അതിൻ്റെ പരിസരങ്ങളും

നിനക്കെന്തിനാണിത്രയും മേഘങ്ങൾ

എന്ന ചോദ്യം 

നിന്നിൽനിന്നുണ്ടായേക്കും അന്നും

ക്ഷമിക്കണം,

എന്നിൽ നിന്നുണ്ടാകില്ല

അന്നും

നിനക്ക്  ചോദിക്കുവാനാണെന്ന

ഭാരമുള്ള ഉത്തരം 

പക്ഷേ ഒരു നെടുവീർപ്പുണ്ടാവും

അന്നും

ഭാഷയിൽ!

ഹേ പ്രശാന്തതേ

സത്ത എന്ന വാക്കിൽ 

തൃപ്തി പോരാതെ

ആത്മീയതയുടെ എസ്സൻസ് 

ഇത്തിരി ചേർത്തേക്കും അന്നും 

ഞാൻ കവിതയിൽ

കുപ്പി ചരിച്ച്നോക്കുമ്പോൾ

മൂലയിൽ ബാക്കിവരും ഒരിത്തിരി

സുതാര്യതയേ അന്നും

ഞാൻ അവഗണിച്ചേക്കും

ഉറക്കച്ചടവ് പിടിച്ച്നിൽക്കുന്ന ബസ്സ്

ജാലകങ്ങൾ പൂർത്തിയാകുമ്പോൾ

പുലരിയാകുമെങ്കിൽ

ചതുരപ്പുലരികൾ അന്നും പൂർത്തിയാക്കുന്നു

കാറ്റ്,

മല്ലയുദ്ധങ്ങളുടെ ലായനി

യോദ്ധാക്കളേ അന്നും അതണച്ചേക്കും

ഉറപ്പ്

ചുംബിക്കുമ്പോൾ തുമ്പികണ്ണുകളും

അതിൻ്റെ ചിറകടിയും

ഒപ്പം തുമ്പിക്ക് പാകമായ ഒരിത്തിരി

ആകാശവും അരികിൽ വേണം എന്ന്

 നിർബന്ധമുള്ള ഒരാൾക്ക് 

അന്നും ഞാൻ ഓർമ്മ പകുത്തേക്കും

പേരിൽ

അതിൻ്റെ പ്രായത്തിൽ തുമ്പിവന്നിരിക്കുന്നു

വിരൽക്കാലങ്ങളുടെ ഋതുവേ

എന്ന് അന്നും അവൾ ചുംബിക്കുന്നു

ഊതിക്കെടുത്താവുന്ന

വായുവിൻ്റെ തുഞ്ചത്ത്

അന്നും ഉടൽനാളം 

ഞാൻ വിരമിച്ച തത്തയിൽ

എത്തിനോട്ടം കുടഞ്ഞിടുമ്പോലെ

കണ്ണിന് ചുറ്റും വട്ടം വരക്കുന്നു

പച്ചയെ കൊന്തിത്തൊട്ട് കളിക്കുന്നു

ഒരു പക്ഷേ അന്നും

ഞാൻ നനഞ്ഞ റേഡിയോയിലെ

പാട്ട് ചെയ്യുമ്പോലെ 

കേട്ട പാട്ടിന് തല തുവർത്തുന്നു

കാത് താരാട്ടിലേക്ക് ചാരുന്നു

വിരമിച്ചവരുടെ റേഡിയോചെല്ലങ്ങളിൽ

നിന്ന് 

പണ്ടുള്ളവർ ചെയ്യും മ്പോലെ 

ഉച്ചത്തിൽ അന്നും ഒരു പാട്ടെടുത്തേക്കും

ഞരമ്പ് കീറിയ വെറ്റിലയിൽ

ഈണം പുരട്ടിയേക്കും

വാ തുറന്ന് ഉള്ളിലേക്ക് 

അന്നും ഒരു ഭാഷ വെച്ചേക്കും

റേഡിയോ കൂട്ടി ഉച്ചത്തിൽ 

അന്നും ഒന്ന് മുറുക്കിയേക്കും

എന്നാലും അന്നും

ചാരിനിൽക്കുവാൻ 

ഒരു വേനൽക്കാലമുള്ള സൂര്യൻ

എന്നാണ് അയാൾ

 പറഞ്ഞുവെക്കുന്നതെങ്കിലോ?