കവിതയിലെ തുന്നൽ കഥയിലെ ആന

 ഉപമ കൊണ്ട് കുളിച്ച് കയറാമെങ്കിൽ

ആനയേപ്പോലെ അഴിച്ചിറക്കി

നടത്തി കൊണ്ട് പോയി 

തെളിച്ച്

തുടരാനാവില്ല കുളിയിൽ

ജലത്തിൽ

തിരികേ വന്ന് 

കയറേണ്ടതുണ്ട്

ഉടലിൽ

മേഘമാണെങ്കിൽ ജലത്തിൽ

ആനക്കും മനുഷ്യനും

ഇടയിൽ 

ഉടലിൻ്റെ തുടർച്ചകളുണ്ട്

കേൾക്കാവുന്ന ചങ്ങലക്കിലുക്കങ്ങൾ

ഇട്ടുവെക്കാവുന്ന പൗഡർടിൻ 

ആന കൊണ്ട് നടക്കുന്നു

കുട്ടിക്കൂറ മണമുള്ള

ഗൃഹാതുരത്തങ്ങളിൽ  ആനയും

മനുഷ്യനും

കറുപ്പിലും കറുപ്പിലും

കറുപ്പിലും വെളുപ്പിലും പുറത്തിറങ്ങുന്നു

വെളുപ്പ് പുറന്തള്ളുന്ന

പകലിൽ

ആന നടത്തം അടങ്ങിയിരിക്കുന്നു

നടക്കുമ്പോൾ ചലനങ്ങളിൽ

പൊന്തി വരും ആന മുഴക്കങ്ങൾ

പകലിനുമുണ്ട് സമയം ചലിക്കുമ്പോൾ

തെളിഞ്ഞ് വരും നിഴലിൽ ഒതുങ്ങാ

പകൽമുഴകൾ

ചലനം കലർന്ന ദിനങൾ പോലെ

കലങ്ങിയ പകൽ

കലങ്ങിയ നദി തെളിയുന്ന ശബ്‌ദം

കോരിയൊഴിച്ച്

കോരിക്കുളിച്ച്

അപ്പോഴും ആന കുളിക്കുന്നു

സൂചിക്കുത്ത് കൊണ്ട ഭാഗം മാത്രം

തിരിശ്ശിട്ട്

തുമ്പിക്കൈയ് നിറയേ ജലം ശേഖരിച്ച്

നടത്തം

നടത്തം

നടത്തം എന്ന തുന്നലാവുകയാണ്

തിരികേ ആന

എഴുന്നെള്ളിപ്പ് 

കുട തിടമ്പ് നെറ്റിപ്പട്ടം

ആലവട്ടം വെഞ്ചാമരം എന്നിവ

മാറ്റി നിർത്തിയാൽ

കൂടെ ആകാശവും

തുന്നി വെച്ച കല

ചന്ദ്രക്കല എന്ന് തന്നെ മുകളിൽ

കലങ്ങിയും തെളിഞ്ഞും

കൂടെ ആനയും പകയും പകലും

നദിയിൽ 

ജലാശയത്തിൽ ഇറക്കി കുളിപ്പിച്ച് 

തിരിച്ച് കൊണ്ട് വന്ന്

കെട്ടുവാനാകുമോ ആകാശത്തെ

അതിൻ്റെ അനാദിയെ

അതിൻ്റെ നീലനിറത്തേ

അതിൻ്റെ ശൂന്യതയേ

അതിൻ്റെ കലങ്ങിയ കൊമ്പിന്നേ

നീലയുമായി പുലബന്ധം പോലുമില്ലാത്ത

കഥയിലെ കറുത്ത നിറത്തേ

അനാദി എന്നത്

വിട്ടുപോയ വാക്കുകളുടെ ഒരു കീറലാണെങ്കിൽ

ശൂന്യതയുടെ തുന്നൽക്കാരാ

നുണ നീലിക്കുന്നു

നിന്നേക്കാൾ ഇളം നീലനിറത്തിൽ

ഇനി  ഇവിടെ എൻ്റെ കവിത 

കഥയിലെ

തുന്നൽക്കാരനായാൽ

പതിവായി അന്ന് ആനക്ക് കൊടുത്തിരുന്ന 

പഴം അവൽ കദളി ശർക്കര തേങ്ങാ 

തുടങ്ങിയ ഉപഹാരങ്ങൾ

അല്ലേൽ ഇവിടെ ആന വേണ്ട

ആകാശം മതി

അതിൻ്റെ ശൂന്യത 

അതിൻ്റെ നീല മതി

വേണമെങ്കിൽ

നിമ്മതി എന്ന വാക്കിനേ വരുത്തും

തമിഴിൽ നിന്ന് 

അതിൻ്റെ ഭംഗിയോട് കൂടി 

ശാന്തതയോട് കൂടി

സമചിത്തത കൂട്ടി

അത്രയും ഹൃദ്യമായി

ഇവിടെ ഇപ്പോൾ

എൻ്റെ കവിതയിലെ സൂചി

ചിലപ്പോൾ അതൊരു വാക്കാവാം

ചലനമാവാം

ശമനമാകാം

നോവാകാം നൂലാവാം

ചിലപ്പോൾ അത് കണ്ടെന്ന് തന്നെ ഇരിക്കില്ല

ചില തിരഞ്ഞുപോക്കുകളിൽ

ഇനി

അത് എത്ര തുന്നിലാലും

കവിയെന്ന നിലയിൽ കൊണ്ട മറക്കാത്ത .കുത്തുകളാവാം

തുന്നിച്ചേർക്കാൻ കഴിയാത്ത

കീറലാവാം

വിള്ളലാവാം

ഏറ്റവും പുതിയ നീക്കമുള്ള 

തുന്നൽക്കാരൻ മേഘം

മഴത്തുന്നൽ

തയ്യൽമെഷീൻ്റെ

ചക്രക്കറക്കം

കവികൾക്കിട്ട് മാത്രം കിട്ടും

അതിൻ്റെ അടിച്ചവിട്ട് 

കവികളേ മുക്കും

വരികളുടെ അടിയൊഴുക്ക്

ആദിയിലുണ്ടായ മേഘമേ

ദൈവത്തിലേക്കുള്ള അതിൻ്റെ

മാർഗ്ഗമേ ദൂരമേ

ദൈവത്തിൻ്റെ അടിവയറേ

പകലിൻ്റെ രതിമൂർച്ഛയേ

നഗ്‌നതയുടെ ദൈവം

തുന്നൽക്കാരനിൽ അന്നും ഒളിച്ചിരിക്കും

ഇടമേ

വസ്‌ത്രങ്ങൾക്കിടയിലൂടെ കത്രിക

നഗ്‌നതയിൽ തൊടും അതിൻ്റെ ജലമൂർച്ചകൾ

നഗ്‌നതയിലേക്ക് മടങ്ങാനൊരുങ്ങും

ദൈവത്തിന് 

അന്നും പതിവായി കിട്ടും

തയ്യൽക്കാരൻ്റെ കുത്ത്

ജലത്തിനും

കുത്തിനും ഇടയിലൂടെ

പതിവുകളുടെ തുമ്പികൈ നീട്ടം

വിരലറ്റങ്ങൾ

രതിമൂർച്ഛകൾ പതിവുകൾ

ദൈവം ഒറ്റപ്പകയുടെ പാതി

പതിവുകൾക്കപ്പുറത്തേക്ക്

നോവുകൾക്കും

രതിമൂർച്ഛകൾക്കും അന്നും

ജലത്തിനും

ജലോപരിതലത്തിന്നുമൊപ്പരം

ചിന്നംവിളി തുന്നിക്കൊടുക്കുന്നതെന്തും!