കൂട് ഉറയൊഴിക്കും കിളി
നാരിൻ്റെ പുളി നോക്കുന്നു
ഞാനും കിളിയും കൂടും
നാരും പുളിയും
പിടിച്ച് വലിക്കുന്നു
വിരലിൽ ശാന്തത കോരിനോക്കും
ബുദ്ധൻ
ശബ്ദത്തിനായി കരയും
അപ്പോഴങ്ങോട്ട് പെറ്റിട്ട
കാതിന്നറ്റം
ഏറ്റവും പുതിയ ബുദ്ധന് പഠിക്കും ആധുനിക ഗ്രാമം
ധ്യാനവും കുപ്പിപ്പാലും
നീക്കി നീക്കി വെക്കും
എന്നാലും
നിലത്തുള്ളതെല്ലാം ജലം
ധ്യാനത്തിൻ്റെ ഡൈവിങ്ബോഡിൽ
ബുദ്ധൻ കണക്കേ നിൽക്കും
സമയം
ബുദ്ധൻ്റെ നുണക്കുഴി താഴെ
നീലനിറത്തിൽ
ആഴത്തിൽ
ഓളങ്ങൾ നിർമ്മിച്ച്
എൻ്റെ നോട്ടത്തിൽ അത് വന്നു തെറിക്കുമോ
ഓളങ്ങൾ ഉള്ള സമയമാവണം
ഓളങ്ങൾ ഉള്ള കള്ളവും
ഒരു ചെമ്മരിയാടാവും കിഴക്ക്
അത് സൂര്യനെ ഉരുമുന്നു
അടുക്കളയിൽ വന്ന്,
തിരക്ക് ഉരുമും പോലെ തന്നെ
അടുക്കളകൾ വീട്ടിൽ,
ചെമ്മരിയാടുകൾ
അവ നേരത്തോട്
നേരമുരുമുന്നു
ഇനി ചെമ്മരിയാടുകളേ സൂര്യൻ
ഉദിക്കുന്നതിന്നിടക്ക്
കോരിയെടുക്കുന്നു
അടുക്കള ഭിത്തിയോട് ചേർത്ത്
കോരിയൊഴിക്കുന്നു
എന്നാവുമോ?
നുണക്കുഴികളുടെ ഉറയൊഴിപ്പാണ്
തൊട്ടുനോക്കുവാനാകില്ല
ധ്യാനം മാത്രം തൊട്ടുനക്കുന്നു
2
സൂര്യനെന്ന ക്വാറി പൊട്ടിച്ച
പാറ പോലെ വെളിച്ചം
പകൽ ഒരു ലോറിയല്ല
ഞാനതിൻ്റെ ഡ്രൈവറല്ല
എന്ന് പറഞ്ഞ് കൊണ്ട് തന്നെ
ഞാൻ എൻ്റെ ഉടൽ,
ട്രാക്റ്റർ പോലെ സ്റ്റാർട്ട് ചെയ്തു നിർത്തുന്നു
അതിൻ്റെ ശബ്ദത്തിൽ
ഞാനും എൻ്റെ പകലും
ചാരി നിൽക്കുന്നു
പകൽ കോരിയൊഴിക്കുന്നു
ആടുകൾക്ക് ഞാത്തിയിടുവാൻ
കൊടുത്ത കാത്,
മേഞ്ഞതിൻ്റെ വിഹിതം എന്നിവ
എൻ്റെ പകലുകൾ
വൈകും മുമ്പ്
തിരിച്ച് ചോദിക്കുമോ?
കാറ്റ് അതിൻ്റെ ഞാത്തിയിട്ട
വീശൽ എന്നിവ സംശയിക്കുന്നു
എനിക്ക് ചോദിക്കുവാൻ
ഒന്നുമില്ല
പറയുവാനും
എൻ്റെ പകലിൻ്റെ നെറ്റി
ആടുകൾ
ഇടിച്ച് പൊട്ടിക്കുന്നു
പടിഞ്ഞാറ് പടിഞ്ഞാറുമായി കോർക്കുന്നതാവണം
പകലിൻ്റെ നെറ്റി, ബുദ്ധൻ
ഒരു കോട്ടുവാ ഇട്ട് കഴിഞ്ഞ്
പവിഴമല്ലികളിൽ ഇട്ടുവെക്കുമായിരിക്കും
3
ഞാൻ ഒരു മരം കൊത്തിയുടെ
സുഷിരം
അതിൻ്റെ നോട്ടം തട്ടിമാറ്റി
മോഷ്ടിക്കുന്നു
വീഴുന്നതിന്നിടയിൽ
അതിൻ്റെ കൊത്ത്
വീണ്ടെടുക്കുന്നു
മരങ്കൊത്തികൾ മുക്കുവന്മാരല്ല
ഞാൻ സുഷിരങ്ങളുടെ ചാകര,
മരങ്കൊത്തികൾക്ക്
പരിചയപ്പെടുത്തി കൊടുക്കുന്നു
മരങ്കൊത്തികൾ,
സുഷിരങ്ങൾ മെരുക്കുന്നു
അടുത്ത് ഉടലുകളുടെ ചാകര
വിരലുകളുടേതും
ആധുനികനാണെന്ന വിശ്വാസത്തിൻ്റെ
ക്വാറിയാകണം
ഉടയ്ക്കുവാനാകില്ല എന്നാവും
ഉള്ളിലിരിപ്പ്
എന്നാലും ഉടയുന്നതാവണം
ഉള്ളിലുണ്ട്
പ്രാകൃതനാകണം എന്ന വാഞ്ഛ
കല്ലുകൾ ക്വാറിപ്പിണക്കങ്ങൾ
കടൽ കല്ലുകളിൽ വന്നടിയ്ക്കുന്നു
ആർക്കുന്നു
മരങ്ങളിലല്ലാതെ സുഷിരങ്ങൾ
മഞ്ഞുകൊള്ളുന്നു
മരങ്കൊത്തികൾ പകലുകൾ
കൊത്തിപ്പറിക്കുന്നു
സുഷിരങ്ങളേ ആരാധിക്കുന്ന ജനത!
മരങ്ങളില്ലാതെ
മരങ്കൊത്തികൾ വീണ്ടും വീണ്ടും
മഞ്ഞിലും പകലിലും
ആഞ്ഞുകൊത്തുന്നു
ഞാൻ അതിൻ്റെ കൊത്തുകൊള്ളുന്നു!
Comments
Post a Comment