വരൂ കുറച്ച് വെക്കൂ ഈ വിളിപ്പേരുകൾ

 

രണ്ടരഅണ എന്നത്  

നിലവിലില്ലാത്ത ഗ്രാമത്തിലെ

എന്നോ പൂട്ടിപ്പോയ ഷാപ്പിൻ്റെ ഇരട്ടപ്പേരാണെങ്കിൽ

രണ്ട് കാലുള്ള നടത്തത്തിൽ 

വന്ന ദൂരം കോരി വെച്ച് 

മഴ തോരുന്നത് നോക്കി 

എടുത്ത് കൊണ്ട് പോകാവുന്ന

വാരിക്കീഴുകളിലേ 

കയറിനിൽക്കലുകൾ

മഴയൊന്നും പെയ്യുന്നില്ലെങ്കിലും

തോരാൻ കാത്തുനിൽക്കുമ്പോലെ

കയറി നിൽക്കാറില്ലേ

ചില വരികളിൽ വാരിക്കീഴുകൾ പോലെ

കൈത്തറി പോലെ

കൈകൾ കൊണ്ട് തിരയിട്ട്

കാലുകൾ കൊണ്ട് ചവിട്ടി

നിർമ്മിക്കാവുന്നവയാവണം

ചില കയറിനിർത്തങ്ങൾ എങ്കിലും

ചവിട്ടിപോലെ 

കയർ കൊണ്ട് നിലത്ത് കിടക്കും

നനവ് 

അതും സിമൻ്റിട്ടത്

അതിലേക്ക് ഒരു ചട്ടിച്ചാന്ത് പോലെ കയറിനിൽക്കും

നനഞ്ഞ വരിയലുകൾ ഉള്ള 

ഉടൽപ്പാടുകൾ

തൊണ്ടിൽ നിന്നും വേർപെട്ട വിധം

നാരുകൾ പിരിക്കും ഉടൽ

തിരിയൻ റാട്ടുകൾ

തോരലുകൾ ഓർത്ത് കിടക്കും

തിരിയും

ജനാലത്താഴത്തേ മഴത്തുള്ളികൾ

വാരിക്കെട്ടിവെക്കും അഴിയും

കൊറുങ്കച്ചുരുൾമുടി 

അതിലെ ഒന്നാം മിന്നാംമിന്നിച്ചുരുൾ 

ആദ്യം ഉണരും പറക്കും

പിന്നെ  കൂടെ പറക്കും സ്വപ്നങ്ങളും

നനഞ്ഞ കക്ഷത്തിൻ്റെ ചരിവിലെ

നനയും നക്ഷത്രക്കണ്ണുകൾ

വന്ന് വീഴുന്നത് മിന്നും

കഴുകി വിരിച്ചിട്ട തോർത്തിൽ 

തുണിയിൽ പിന്നെ ആണിയിൽ

ആദ്യം ഈറൻ 

പിന്നെ മഴത്തുളി പിന്നെ കരിമ്പൻ

പിന്നെ മഴവെള്ളം പഴന്താലി

പിന്നെ തോരലുകൾ  എന്നിങ്ങനെ വന്ന്

എക്കി നിൽക്കും

മറ്റൊരു ദിവസം ഇറ്റും

വീശുന്നതിൻ്റെ കൊത്തുപണികൾ

തളർത്തുന്നില്ല

കാറ്റിന് വേണ്ടി മാത്രം പ്രവർത്തിക്കുന്ന

കാറ്റാടിയന്ത്രങ്ങളിൽ കണ്ണ് വെയ്ക്കും

ഇമ ചേർത്ത് അടക്കും

മിടിപ്പിൻ്റെ തീരത്തെ ഹൃദയത്തിൻ്റെ

നിർത്താതെ ഉലയും

അന്നത്തേ കടത്തുതോണിയിൽ

അന്നത്തെ ആദ്യത്തെ കാത്തുനിൽപ്പായി

നടന്ന് കയറും ഇരിക്കും

തഴപ്പായിലെ നെയ്ത്ത് ശീലങ്ങൾ

അത് വന്ന് ഉടലിൽ വിരിയും

കിടന്ന പാടുകൾ

എല്ലാ മഴയും

കുറക്കൻമാരാവുന്ന രാവിൽ

മഴക്കൂവലിൻ്റെ വയറ്റാട്ടി

കുയിൽ

ഒരു പ്രസവം എടുത്ത

വയറ്റിലെ അതിൻ്റെ കൂവൽപ്പാടുകൾ

അതിൻ്റെ ചുവന്ന കണ്ണുള്ള

മറ്റൊരു ദിനത്തിൽ പിറക്കും

രാത്രിയുടെ മറുപിള്ള

രാക്കുയിൽ പാട്ടുകൾ

ഒരു കൂവലിനെ പെറ്റ് കിടക്കും

കുയിൽ

മുട്ട കേട്ടുകിടക്കും

അതിൻ്റെ കൂടെന്ന നുണ

വിരിഞ്ഞാലുടൻ നനഞ്ഞ തൂവലുമായി

കൂകുവാൻ പോകും അതിൻ്റെ അന്തികുഞ്ഞോളങ്ങൾ

അവസാനം പറഞ്ഞ നുണ നനയാതിരിക്കുവാനായി മാത്രം

ഞാനും കുറുക്കനും 

അന്നും 

രാത്രിക്കരികിലെ ഒരു കൂവലിൽ

ഒരു മഴയേയും കൂട്ടാതെ

കയറിനിൽക്കും

വെറുതേ!

മഴവെള്ളം എന്ന് പേരുള്ള നിലാവ്

ഒരു പരാതിപോലെ പെയ്യും മഴയോട്

അന്നും,

അതും പതിഞ്ഞ താളത്തിൽ പറയും, 

വരൂ കുറച്ച് വെക്കൂ 

ഈ വിളിപ്പേരുകൾ.