മരണം എന്ന രൂപത്തിൽ പുരുഷൻ

അങ്ങനേയിരിക്കെ

ജീവിച്ചിരിയ്ക്കുവാൻ

ഒരു മുഖം വേണ്ടെന്നായി

മുഖം ഇല്ലാതെ

നഗ്നതയ്ക്കു സുതാര്യമായി

ഉടലില്ലാതെ

ജീവിച്ചിരുന്നവരെ

ധൂർത്തന്മാരെന്ന് വിളിച്ചുതുടങ്ങീ

ലോകം.

മരിച്ചുപോയവരെ തിരിച്ചുവിളിക്കും

വരെ

ലോകം എന്തു വേണമെങ്കിലും

വിളിച്ചോട്ടെ,

എന്ന് മാത്രം കരുതി

മരിച്ചുപോയവർക്കും വേണമല്ലോ 

ഒരു കരുതൽ

മരിച്ചുപോയതിന്

പകരം.

കവിത കൈമാറി വന്ന മനുഷ്യരെ

ഇവിടെ ഉണ്ടായുള്ളു

അത് കൊണ്ട് തന്നെ

അവർക്ക് മുന്നിൽ കഥകൾ വിശ്വാസ്യയോഗ്യമല്ലാതായി

മരിച്ചുപോയവരുടെ

മരിച്ചുപോയശേഷമുള്ള

വേശ്യയായി ആകാശം

മരിച്ചുപോയവരെല്ലാം ആണുങ്ങളാണോ?

ആണുങ്ങളെല്ലാം സ്ത്രീലമ്പടന്മാരാണോ ?

സ്ത്രീകൾ മരിക്കാറില്ലേ

മരിച്ചവരിൽ കുട്ടികളില്ലേ

മറ്റു ജീവജാലങ്ങൾ മരിയ്ക്കാറില്ലേ

സ്വാഭാവികമായി ഉണ്ടായി

അനേകം സംശയങ്ങൾ.

ശവക്കുഴി

ഉടലുകളുടെ ആസക്തൻ

മരിച്ചവരേക്കാൾ ആഭാസൻ

വിഷയാസക്തൻ

ഒരു കുഴിയിലും

ഇനിയും അടക്കപ്പെടാത്ത തെമ്മാടി

മരണത്തേക്കാൾ നിഷേധി

ജീവിതത്തേക്കാൾ ധിക്കാരി.

അവനാണാ സത്യം പറഞ്ഞത്

മരിക്കുന്നവരെല്ലാം പുരുഷൻമാർ

സ്ത്രീകൾക്ക് ഇല്ലാ മരണം

സ്ത്രീകൾക്ക് വിധിച്ചിട്ടില്ലാ മരണം

അവർ മറ്റു സ്ത്രീകളെ പ്രസവിച്ച്

അവരിലൂടെ ജീവിക്കുന്നു.

മരിയ്ക്കുമ്പോൾ

മരിയ്ക്കുവാൻ വേണ്ടി മാത്രം

അവർ പുരുഷന്മാരാകുന്നു

മരിയ്ക്കുമ്പോൾ കുട്ടികൾ മുതിരുന്നു

അവർ മരണശേഷവും മുതിരുന്നു പുരുഷന്മാരാകുന്നു.

മരണം പുരുഷൻമാർക്ക് വേണ്ടി

മാത്രം

സംവരണം ചെയ്യപ്പെട്ട ഒരിടമാകുന്നു

ലോകം.

ന സ്ത്രീ മരണമർഹതി

മരണത്തെ സ്വാതന്ത്ര്യം കൊണ്ട് മറച്ചതെറ്റിന് 

മനുസ്മൃതിയോളം വെറുക്കപ്പെടുമ്പോഴും

ജീവിച്ചിരിയ്ക്കുന്ന തെറ്റിന്

മരിയ്ക്കുന്ന തെറ്റിന്

പുരുഷൻ വീണ്ടും വെറുക്കപ്പെടുന്നു.

ജീവിച്ചിരിക്കുന്നവരെല്ലാം

സ്ത്രീകളാവുന്നു.

നിരന്തരം സ്ത്രീകളുടെ രക്ഷയെക്കുറിച്ച്

മാത്രം സംസാരിയ്ക്കുന്ന

ലോകത്ത്

സ്ത്രീകൾക്ക്

രക്ഷ 

സുരക്ഷിതത്വം

പരിരക്ഷ

കിട്ടാത്ത കാലത്ത്

പുരുഷന്മാരായി ജീവിച്ചിരിയ്ക്കുവാനാകില്ല.

മരിയ്ക്കുവാൻ വേണ്ടി

മരിയ്ക്കുന്നവർക്ക് വേണ്ടി

മരിയ്ക്കപ്പെടാൻ വേണ്ടി

അവർ കൂടുതൽ കൂടുതൽ  പുരുഷന്മാരാക്കപ്പെടുന്നു

സ്ത്രീകൾക്ക് മരിയ്ക്കുവാനാകില്ല

അവർ ജീവിതം

എന്ന സത്യത്തെ പ്രസവിയ്ക്കുന്നു

അവർ നിത്യതയുടെ അമ്മ

പുരുഷമരണം

സ്ത്രീമരണം എന്ന് വേർതിരിവുകൾ ഉള്ള

ശുചിമുറിയല്ല മരണം

ഇവിടെ

മരണം

പുരുഷന്മാർക്ക് മാത്രം പ്രവേശനമുള്ള

ശുചിമുറിയാവുന്നു 

ഒന്നുനിർത്തുന്നു

ഒന്നിനുമല്ലാതെ

മുന്നിൽ

നിറം ചാട്ടം നിശ്ചലത

എന്നീ മൂന്ന് ശുചിമുറികളുള്ള

പുരുഷനാകുന്നു പുൽച്ചാടി

അത് നിരന്തരം

പുരുഷനിൽ നിന്നും

പുറത്തുകടക്കാൻ

ചാടുന്നു.