ഉറക്കത്തിൻ്റെ എഡിറ്ററേ എന്നൊരു അഭിസംബോധന

ഉറക്കം വരുന്നു എന്ന പംക്തി 

ആരംഭിക്കുന്നു

ഉറക്കത്തിൻ്റെ എഡിറ്ററേ

എന്നൊരു അഭിസംബോധനക്ക്

കാവലിലിരിക്കുന്നു

ഉറക്കം തകിലിൻ്റെ ആകൃതി വലിച്ചിട്ടിരിക്കുന്നു

തോൽ വള്ളികൾ കൊണ്ട്

ഉറക്കത്തിൽ തട്ടിക്കൊട്ടി 

ഉടൽ അയച്ചു നോക്കുന്നു

ഉറക്കത്തിൻ്റെ തോല് 

ഉറക്കത്തിൻ്റെ വിരല്

ശബ്ദം കുറച്ച് വെച്ച്

പുരികങ്ങൾ പിന്നേയും ഉറക്കം മുറുക്കുന്നു

ഉറക്കം തലയിണകൾതോറും

കയറിയിറങ്ങുന്നു

ചുംബനങ്ങളിൽ ഉറക്കം തെന്നിമാറുന്നു

ഉറക്കം കൊളുത്തിൽ ഒരു നിമിഷം

തങ്ങുന്നു

പിന്നെ ജനൽ പതിയേ മുറിച്ച് കടക്കുന്നു

രാത്രിയുടെ സൈഡ് വ്യൂ മിറർ

എന്ന വണ്ണം ഉറക്കം

വീടിൻ്റെ അരികുകൾ

ഉറക്കത്തിൽ തട്ടാതെ നോക്കുന്നു

കോട്ടുവായകൾ പിന്നിട്ട്

ഉറക്കം പിന്നേയും മുന്നോട്ട് പോകുന്നു

ഇടുങ്ങിയ ഇടവഴികളിൽ

ഇന്നലെയിൽ തട്ടാതെ

ഉറക്കം പിന്നിലോട്ടെടുക്കുന്നു

ഉള്ളിലെ നിലാവിൻ്റെ 

റിയർവ്യൂ മിററിൽ നോക്കി എന്ന്

പിന്നേയും

സ്വപ്നം റിവേഴ്സ് എടുക്കുന്നു

എനിക്ക് വേണമെങ്കിൽ ഭാഷയും

മിന്നാംമിനുങ്ങിൻ്റെ മിനുക്കവും

ഇപ്പോൾ ഇത്തരുണം പിറകിലേക്കെടുക്കാം

അതേ സമയം ഉറക്കം തൊഴുത്തിൽ

പയ്യിൻ്റെ അകിടിൽ ഒരേ സമയം

ഉറക്കം ചുരത്തുന്നു

പിന്നെ ഉറക്കവും തൂങ്ങുന്നു

ഉറക്കത്തിനേ

പയ്യ് കിടാവായി

ആ പശുവിൻ ചോട്ടിലേക്ക് അഴിച്ചുവിടുന്നു

പാലുള്ള വീടുകൾ എന്ന്

പുലരികൾ