ബുദ്ധനിൽ നിന്നും ഊറിവരും ആട്ടിൻകുട്ടിയെ പോലെ മഞ്ഞ് കാലം

മഞ്ഞിൻ്റെ മൂലകങ്ങളുള്ള 

ഒരു ആവർത്തനപ്പട്ടികയാവും പകൽ

മഞ്ഞുകാലത്തിൻ്റെ സകല മൂലകങ്ങളും

അതിൻ്റെ ആറ്റമികഭാരം

രേഖപ്പെടുത്തി

അതിൽചാരി ഇരിക്കുന്നു

മഞ്ഞു കൊണ്ട് ബോഗിയും 

മഞ്ഞു കൊണ്ടുള്ള 

ജാലകങ്ങളും നിർമ്മിച്ച് 

കാലം ഒരു തീവണ്ടിയായി

മുന്നിൽ വന്ന് നിൽക്കുന്നു

മഞ്ഞ് കൊണ്ട് നിർമ്മിച്ച അവ്യക്തതയുടെ ഭംഗിയുള്ള 

റെയിൽവേ സ്റ്റേഷൻ

മഞ്ഞുകാലങ്ങളുടെ സ്റ്റേഷൻമാസ്റ്റർ

അയാൾക്ക് വീശുവാനുള്ള കൊടി മഞ്ഞിൽ നിർമ്മിച്ച് 

മഞ്ഞ് മാറിനിൽക്കുന്നു

നിരുത്തരവാദിയായ മഞ്ഞുകാലം എന്ന്

കാലം അയാളെ ശകാരിക്കുമോ?

മഞ്ഞ് കൊണ്ടുണ്ടാക്കിയ ശകാരങ്ങൾ

മഞ്ഞ് കാലം കേൾക്കുന്നു

കാണുന്നത് കുറച്ച്

മഞ്ഞ് മഞ്ഞിനെ കേട്ടിരിക്കുന്നു

മഞ്ഞ് കൊണ്ട് നിർമ്മിച്ച കാത്

മഞ്ഞ് കൊണ്ട് നിർമ്മിച്ച പാട്ട്

മഞ്ഞ് കാലത്തിൻ്റെ ഹമ്മിങ്

മഞ്ഞിനും മുന്നേ പോകുന്നു

മഞ്ഞ് ചാരി എൻ്റെ ഉടൽ മഞ്ഞുകാലത്തിൽ നിന്നും പുറത്തിറങ്ങുന്നു

എൻ്റെ മഞ്ഞ് ചാരി ഉടൽ എന്ന്

മഞ്ഞ് പാട്ടിനേ

ഇന്നലേയിലേക്ക് ഇറങ്ങുന്ന

ചെറുപ്പക്കാരനെ പ്പോലെ

ഇന്നലെയുടെ തീയിട്ട്

എൻ്റെതല്ലാത്ത ഉന്മാദങ്ങൾ 

മഞ്ഞ് കായുവാനിരിക്കുന്നു

ഓരോ മഞ്ഞും

അതിൻ്റെ മാത്രം കവിതക്ക് 

ആളാത്ത തീയിടുന്നു

മേപ്പിളിലകൾ പോലെ

ഇന്നലെകൾ മുറിക്കും മഞ്ഞ്

അടരുന്നതിൻ്റെ ആകൃതിയിൽ

മഞ്ഞിനും മരത്തിനും ഇടയിൽ

മഞ്ഞ് കൊണ്ടുണ്ടാക്കിയ ഇന്നലെ

ഒട്ടിച്ച് വെക്കുന്നു

ബുദ്ധനിൽ നിന്നും ഊറിവരും

ആട്ടിൻകുട്ടിയെ പോലെ മഞ്ഞ് കാലം അവ ഇന്നലെകളേയോ

ആട്ടിൻകുട്ടികളേയോ ഉപദ്രവിക്കുമോ എന്ന്  

ആരുടെതുമല്ലാത്ത ധ്യാനം

സംശയിക്കുമോ

ബുദ്ധനിൽ നിന്നും ഊറിവരും

ആട്ടിൻകുട്ടിയെ പോലെ മഞ്ഞ് കാലം

എന്ന് എഴുതി

ആട്ടിൻകുട്ടികളുടെ ഉപമയിൽ

മഞ്ഞുകാലത്തെ ചേർത്തുനിർത്തുന്നു

നോക്കുമ്പോൾ ഇന്നലെകളും ആട്ടിൻകുട്ടികൾ

എൻ്റെ സംശയങ്ങൾ ആട്ടിൻകുട്ടികളാവുന്നു അവ മഞ്ഞുകാലം വളയുന്നു