നാല് തുള്ളി ജനൽ ഒരു വീടാവും വിധം

വീടിന്റെ മാവ് കുഴച്ച്

ജനലുകൾ അപ്പം ചുടുന്നു

ജനലുകൾ മേഘങ്ങളല്ല

എന്നിട്ടും അവ 

മറ്റു വീടുകളുടെ മുറ്റങ്ങളിൽ

പതിയേ എന്ന നീക്കങ്ങളുമായി

പെയ്യുവാൻ പോകുന്നു

നോക്കിനിൽക്കുന്നു എന്ന വാക്ക് 

ചെടികളിൽ

പൂക്കളായി വിരിയുന്നത് വരെ

വിരിഞ്ഞുകഴിഞ്ഞാൽ

തിരികെ 

വിരിഞ്ഞതിന്റെ ക്ഷീണവുമായി

പൂക്കൾ

കൊഴിഞ്ഞുവീഴുവാൻ 

വരുന്ന ഇടം

ഒരു പക്ഷേ ചെടികളിൽ നിന്ന്

അതിഥിനിഘണ്ടുവിലെ 

ഇനിയും കൊഴിയാത്ത ഒരു വാക്ക്

മുറ്റം കഴിഞ്ഞ്

വീടാവുന്നു

വരണ്ട

മേൽക്കൂരപുരണ്ട 

മേഘങ്ങളേയും കൂട്ടി

വീടിന്റെ വാരിക്കീഴിലേയ്ക്ക് 

തോരുവാൻ വരും മഴ

വരണ്ടവാക്കുകളുടെ മേൽക്കൂര

ചുവരിന് മുകളിൽ

നിലത്ത് ചരലിൽ 

കുഴികൾ കുത്തി

മഴത്തുള്ളികൾ വാരിക്കെട്ടിവെച്ച

ചുവരോട് ചേർന്ന വാരിക്കീഴ്

ജനലുകൾ ചുവരുമായി 

നിരനിരയായി കലരുന്നിടത്ത്

വൃത്തത്തിൽ വീടിന്റെ കടവ്

നിലത്ത്

അകലങ്ങളിലേയ്ക്ക് 

അലഞ്ഞലഞ്ഞ് പോകും 

വെള്ളത്തിൽ

ഓരോ തുള്ളിയും ഇറ്റി

ഓളങ്ങളുണ്ടാക്കുന്നു

അകന്നകന്നുപോകും 

കിളികളുടെ തോണി

നാലുതുള്ളി ജനൽ ഒരു വീടാവുന്ന ഇടം

അതിലൊരു തുള്ളി 

എടുത്തുവെയ്ക്കും മഴ 

അത് വീടിന്റെ ഏകാന്തതയെ 

മെല്ലെ എന്ന വാക്ക് കലക്കിത്തൊടുന്നു

വാതിലാവുന്നുണ്ടാവണം

ഇടയ്ക്ക് വന്നുപോകുന്ന ചാറ്റലുകൾ

ഇരുട്ട് മാറ്റിവെച്ച്

രാത്രിയഴിച്ചിട്ട് 

വീടിന്റെ സ്വകാര്യതയിൽ 

കുളിയ്ക്കുവാനിറങ്ങും നിലാവ്

കുളിച്ചുകയറുമ്പോൾ

താഴെ 

കലകളിലേയ്ക്ക് മാറ്റപ്പെടും ഓളങ്ങൾ

മുകളിൽ 

മാറ്റച്ചന്ദ്രനെ ആവശ്യപ്പെടും നിലാവ്

പിറ നിഷേധിയ്ക്കപ്പെട്ട ചന്ദ്രനെ

ഒളിച്ചൊളിച്ച് അണിയുകയാവണം വീട്

പകൽ 

വീടിന്റെ അമ്മയാവും ജനാലകൾ

വീട് കുഞ്ഞാവുന്ന ഇടങ്ങളിൽ

അത് വീടിനെ പരിചരിയ്ക്കുന്നു

അത് വീടിനെ വാരിയണയ്ക്കുന്നു

പുറം കാഴ്ച്ചകൾ കാണിച്ച് മാമൂട്ടുന്നു

മീനമാസവേനൽ 

സൂര്യന്റെ അടി കാണും 

ഇടവമാസക്കിണർ

ഇടയ്ക്ക്

വെള്ളം കുറഞ്ഞുതുടങ്ങിയ കിണറിനെപ്പോലെ

തൊടിയിൽ തല വെച്ച്

ആഴമഞ്ഞയോടുള്ള വീടിന്റെ 

മേടമാസക്കലഹങ്ങൾ

മറുവശം തണലുള്ള 

ജാലകയില

കിണറിന്നരികിലെ അകലക്കല്ല്

ഒരു ജനലുണ്ടാവുന്നതിന്റെ

ആശ്വാസത്തിലേയ്ക്ക് വീട് തല ചായ്ക്കുമ്പോലെ

മഴയെ വിളിച്ചു കൊണ്ട് വന്ന് മുറ്റത്ത്

പെയ്യിക്കുന്ന

കർക്കിടകജാലകങ്ങൾ

വയസ്സാകുമ്പോൾ

വയ്യാ എന്ന ചതുരത്തിൽ വീട്

അരികിലിരുന്ന് പരിചരിയ്ക്കും വിധം

അഴികളുള്ള നഴ്സാവും ജനാലകൾ

ഇന്നലെകൾ 

അതിലെ രണ്ട് പാളികൾ

എപ്പോഴോ പാതി വന്നടഞ്ഞത്

മാസങ്ങളില്ലാത്ത കലണ്ടറിലെ

രണ്ടാന്തിപ്പുഴ

നാലുമണിമുറ്റം

ഗൃഹാതുരത്വത്തിന്റെ 

മണമുള്ള പൂക്കൾ പിടിയ്ക്കും 

ഒരു ചെടിയാവും വീട്

ഏകാന്തതയെ ഇറുത്ത് 

പൂക്കളായി

അപ്പോഴും വീടിന്നടുത്ത്

മുറ്റത്ത് വെയ്ക്കുകയാവണം

ജാലകങ്ങൾ.