ദൈവം കാഴ്ച്ച എന്നീ നിലകളിൽ

ഞാനിന്ന് ദൈവത്തിനെ കണ്ടു
അദൃശ്യത എവിടെയോ
മറന്നുവെച്ചത് പോലെ
തികച്ചും
നിശ്ശബ്ദനായിരുന്നു
ദൈവം

ഇന്നലെവരെ കണ്ട ദൈവങ്ങളിൽ നിന്നും
വ്യത്യസ്തനായിരുന്നു
ദൈവം

നിശ്ചലതയുടെ തുള്ളിയിറ്റി

രണ്ടുതുള്ളികൾക്കിടയിൽ
നിശ്ചലത
വ്യത്യസ്തമായി

നോക്കി നിൽക്കേ
നിശ്ശബ്ദത
ഒരൽപ്പം നീക്കിവെച്ചു
ദൈവം

നീക്കി         വെച്ച നിശ്ശബ്ദത,
മറ്റൊരു ദൈവമാകുന്നതും
ദൈവമാകുന്ന നിശ്ശബ്ദത ആരാധിയ്ക്കുവാൻ
ഒരു കൂട്ടത്തിന്റെ അരികുകൾ
രൂപപ്പെടുന്നതും
കണ്ടു

രൂപത്തിന്റെ പടം പൊഴിച്ച്
എങ്ങൊട്ടെന്നില്ലാതെ
എഴുന്നേറ്റുപോയി
അരക്കെട്ടുകൾ കുഴിഞ്ഞ ദൈവം

കുഴികളിറ്റി
അരക്കെട്ടുമിറ്റി
കുഴിയ്ക്കും അരക്കെട്ടിനുമിടയിൽ
എഴുന്നേറ്റുപോകുന്നതിന്റെ
ഒരു വിടവുണ്ടായി

ഇമകൾ കടത്തികൊണ്ടുപോകുന്നവർക്കിടയിൽ
എന്റെ കണ്ണുകളിലും
ഉണ്ടായിവന്നു
ഒന്നുമിറ്റാതെ,
നിശ്ശബ്ദതയുടെ
രണ്ടുകുഴികൾ.